Hytaýyň Daşary işler ministri Pekinde portugaliýaly kärdeşi bilen duşuşyk geçirip, global söwda dartgynlygynyň artan bir döwründe Hytaý bilen Ýewropanyň arasyndaky gatnaşyklaryň güýçlendirilmegi barada çagyryş berdi.

Hytaýyň Daşary işler ministri Wan I, Portugaliýanyň Daşary işler ministri Paulo Rangel bile geçiren duşuşygynda, Hytaýyň Portugaliýa bilen bilelikde işleşip Hytaý-Ýewropa gatnaşyklaryny ösdürmegini isländigini habar berdi. Hytaýyň Daşary işler ministrliginiň sişenbe güni beren beýanatyna görä, Wan I: “Hytaý Ýewropany köp polýarly dünýäniň möhüm sütünleriniň biri hökmünde görýär we Ýewropanyň strategik garaşsyzlygyny saklamagyny goldaýar” diýdi.

Rangeliň sapary, soňky bäş ýylyň dowamynda Portugaliýanyň hökümetinden Hytaýa ýokary derejeli ilkinji sapary bolup, bu sapar ÝB agza döwletleriniň Waşington we Pekin bilen söwda urşy ähtimallygyna alada bildirilýän döwrüne gabat geldi.

ABŞ-nyň Prezidenti Donald Trampyň ýolbaşçylyk etmegindäki hökümediň transatlantik gatnaşyklary we global söwdany bozmak üçin edýän hereketleri Pekin bilen Ýewropanyň paýtagtlarynyň biri-birlerine bolan gyzyklanmasyny ýaňadandan artdyrdy

Rangel bilen birlikde Fransiýanyň Daşary işler ministri we Italiýanyň Senadynyň başlygy şu ýyl Hytaýa sapar gurap, Hytaýyň resmileri bilen duşuşyklar geçirerler.

ABŞ, ÝB-den daşary Portugaliýanyň eksportynyň esasy ugrudyr, emma Portugaliýa Günbatar Ýewropada Hytaýyň esasy halkara infrastruktura taslamasy bolan “Bir guşak, bir ýol” başlangyjyndan çykmadyk ýeke-täk ýurt bolup galýar.

Geçen ýyl Portugaliýa Hytaýda öndürilen elektrik tokda işleýän ulaglara garşy ÝB tarapyndan salgyt girizmek baradaky ses berişlikde ses bermekden saklandy we Hytaýyň bu pudakdaky maýa goýumlaryny goldady.