Sudanyň Omdurman şäherinde, hakyna tutma RSF güýçleri tarapyndan guralan hüjümde ikisi çaga asuda ilatdan 3 adam ýogaldy.

Şaýatlar, harby goşunyň gözegçiligi astyndaky etrapçalary nyşana alan hüjümde ýedi topuň atylandygyny mälim etdi. Sudanyň harby goşuny soňky günlerde RSF güýçlerinden paýtagt Hartumyň merkezinde döwlet eýeçiligindäki edaradyr kärhanalaryň bir bölegini yzyna alypdy.

Al-Nao hassahanasyna ýakyn töwerekler, “Hüjümde iki çaga bilen bir zenan ýogaldy, sekiz adam ýaralandy” diýdi. Bu hassahana şäherinde öz işini dowam etdirýän birnäçe hassahanadan biri hökmünde bilinýär.

RSF güýçleri 2023-nji ýylyň aprel aýyndan bäri Sudanyň harby goşuny bilen çaknyşýar. Şol çaknyşyklar on müňlerçe adam ýogalmagyna, 12 milliondan gowrak adamyň öýüni terk etmegine we dünýäniň iň uly açlyk krizislerinden birine sebäp boldy.

RSF güýçleri paýtagtda galmaga dowam edýär

Harby goşun bilen ýaranlary, anna güni prezident köşgüni RSF güýçlerinden yzyna aldy we döwlet eýeçiligindäki edaradyr kärhanalary RSF güýçlerinden yzyna almak üçin işe girişdi.

Şenbe güni hakyna tutma güýçler tarapyndan ele geçirlen merkez banky, milli razwetka gullugy we milli muzeý ýaly birnäçe ýeriň yzyna alynandygy habar berildi.

RSF, Hartumyň merkezi bilen birlikde howa menziliniň töwereklerini we paýtagtyň günortasy bilen günbataryny gözegçiligi astyna alypdy. Günbatar Omdurmandaky pozisiýalaryndan yzygiderli ýagdaýda asuda ilata garşy hüjümler guraýar.

Fewral aýynda RSF güýçleriniň Omdurmanda bazar ýerine guran hüjüminde 50-den gowrak adam ýogalypdy.

Harby goşunyň paýtagtda öňe gidişlik edendigine garamazdan Afrikanyň üçünji uly ýurdy iki bölege bölündi. Harby goşun ýurduň gündogaryna we demirgazygyna gözegçilik edýär. RSF bolsa günbatardaky Darfur sebitine we günortada käbir etraplara gözegçilik edýär.