Hytaý, Günorta Koreýa we Ýaponiýa erkin söwda gatnaşyklaryny güýçlendirmek barada ylalaşdylar. Bu barada Seulda geçirilen ýokary derejeli duşuşykdan soň bilelikdäki beýannamada aýdylýar.
Ýekşenbe güni geçirilen maslahat, üç ýurduň ministrler derejesinde 5 ýyl arakesmeden soň geçirlen ilknji duşuşyk boldy. Maslahat ABŞ-nyň prezidenti Donald Trampyň awtoulaglar, ýük ulaglary we awtoulag şaýlary ýaly köp sanly import harytlaryna salgyt girizmegi bilen global söwdada dörän dartgynlylykdan soň geçirildi.
Günorta Koreýa we Ýaponiýa esasy awtoulag eksportçylary bolup durýar, Hytaý hem ABŞ-nyň täze salgytlaryndan ep-esli täsir aldy.
Maslahata Günorta Koreýanyň senagat ministri Ahn Duk-Geun, Ýaponiýanyň ministri Ýoji Muto we Hytaýyň söwda ministri Wang Wentao gatnaşdy.
Üç ýurt hem giňişleýin üçtaraplaýyn erkin söwda ylalaşygy boýunça gepleşikleri tizleşdirmek barada ylalaşyga geldiler we "öňünden çaklanylýan söwda we maýa goýum gurşawyny" döretmek barada ylalaşdylar.
Günorta Koreýanyň senagat ministri Ahn, üç ýurduň global kynçylyklara "bilelikde" jogap bermelidigini belledi.
Ahn: "Häzirki ykdysady we söwda gurşawy global ykdysadyýetiň has-da böleklenmegi bilen häsiýetlendirilýär" diýip belläp, bu ýagdaýyň umumy hyzmatdaşlygy mejbur ýagdaýa getirýändigini beyan etdi.
