Hytaý mundan beýläk ABŞ-nyň "salgyt tarifleri oýnuna" üns bermejekdigini mälim etdi. Bu beýanat Hytaýyň Daşary işler ministrligi tarapyndan Ak Tamyň Hytaýyň gaýtawul çäreleri sebäpli 245 göterime çenli salgyt tölemeli boljakdygyny beýan etmeginden soň berildi.
Pekin bu beýanaty penşenbe berdi. Ak Tam sişenbe güni çap eden maglumatynda Hytaýyň umumy salgytlarynyň gaýtawul tarifi hökmünde 125 göterim, fentanil krizisini çözmek üçin 20 göterim salgyt we adalatsyz söwda amallaryny ortadan aýyrmak üçin 7,5 göterimden 100 göterime çenli salgytlary öz içine alýandygyny beýan etdi.
Hytaý şol gün ABŞ-ny söwda gepleşiklerinde "maksimum basyş" we "şantaj" usullaryny bes etmegä çagyrdy. Bu beýanat, çarşenbe güni Prezident Donald Trampyň söwda urşy barada "top Hytaýyň meýdançasynda" diýen sözlerine jogap hökmünde berildi.
"Hytaý biziň bilen şertnama baglaşmaly. Biziň olar bilen şertnama baglaşmaga zerurlygymyz ýok" diýip, Tramp beýan etdi.
Söwda dartgynlylygy
Tramp iki hepde ozal ähli ýurtlara goşmaça gümrük salgydyny girizjekdigini yglan edipdi, emma soň birnäçe ýurt üçin "ikitaraply salgytlary" ýatyrdy. Ýöne Hytaýa garşy ýokary salgytlaryny dowam etdirdi. Pekin ABŞ-nyň harytlaryndan alynýan salgytlary ýokarlandyrdy we özara hormat goýmak hem-de deňhukuklylyk esasynda gepleşikleriň geçirilmelidigini beýan etdi.
Şol bir wagtyň özünde, köp sanly ýurt Waşington bilen ikitaraplaýyn ylalaşyk üçin çykaşlga gözleýär. Geçen hepde Hytaý Bütindünýä Söwda Guramasyna şikaýat bilen ýüz tutup, ABŞ-nyň salgytlarynyň guramanyň düzgünlerini bozýandygyny beýan edip, "çynlakaý alada" bildirdi.
Hytaý şu hepde garaşylmadyk ýagdaýda täze söwda wekilini belledi. Söwda dartgynlylygyny çözmek üçin möhüm rol oýnamagyna garaşylýan täze wekil, Hytaýyň Bütindünýä Söwda Guramasyndaky wekili Li Çenggang bolup, ozalky wekil Wang Şouweniň ýerine bellendi.
Waşington Trampyň Hytaý bilen söwda şertnamasyny baglaşmaga açykdygyny, ýöne ilkinji ädimi Pekiniň ätmelidigini aýtdy. Şeýle hem, Hytaýyň " ABŞ-nyň puluna mätäçdigini" öňe sürdi.
