Ysraýylyň Goranmak ministri Katz, Ysraýylyň aşa sagçy hökümetiniň Palestinada 22 sany täze bikanun sionist ilatly ýerleriň gurulmagy baradaky kararyndan soň, basyp alynan Günbatar Şeriada “Ýehudi Ysraýyl döwletini” gurmagy wada berdi.
Katz, anna güni beren beýannamasynda, bu karar bilen Fransiýanyň Prezidenti Emmanuel Makrona anyk ýüzlenmäniň berlendigini aýtdy.
Makron soňky döwürde Palestinalylara berýän goldawyny artdyrypdy we Ysraýylyň Daşary işler ministrligi tarapyndan “Ýehudi döwletlerine garşy haçly ýöriş” geçirmekde günäkälenipdi
Halkara hukugyna görä, bikanun hökmünde kabul edilýän we parahatçylygy bökdeýän sionist ilatly ýerleriniň gurulmagyna uly garşylyk görkezilýär.
Penşenbe güni täze sionist ilatly ýerleriň gurulmagy boýunça kabul edilen karara BMG bilen birlikde halkara jemgyýetçiligi uly garşylyk görkezdi.
Katz “Bu şol bir wagtda Makrona we onuň tarapdarlaryna berlen anyk ýüzlenmedir. Olar kagyz ýüzünde Palestina döwletini ykrar eder, emma biz şol ýerde Ýehudi Ysraýyl döwletini gurarys” diýdi.
Katz “Olaryň kagyzy taryhyň garaňky sahypalarynda galar emma Ysraýyl döwleti gülläp öser” diýip belledi.
Iki döwletli çözgüt
Fransiýanyň Prezidenti Emmanuel Makron aprel aýynda beren beýannamasynda, ýurdunyň iýun aýynda garaşsyz Palestina döwletini ykrar edip biljekdigini aýdypdy.
Makron anna güni Singapursa guran saparynyň çäginde beren beýannamasynda Palestinanyň ykrar edilmegi meselesinin diňe ahlak meselesi däl eýsem şol bir wagtda syýasy jogapkärçilik” bolandygyny ýene-de bir gezek nygtady.
Gazada ýagdaýyň gün saýyn agyrlaşýandygyna ünsi çeken Makron, Ýewropa ýurtlaryna Ysraýyla garşy berk tutum alyp barmaklary üçin çagyryş etdi.
Beýleki tarapdan Fransiýa bilen Saud Arabystany iýun aýynda BMG-da halkara konferensiýanyň geçirilmegi üçin taýarlyk görýär. Şol konferensiýa Ysraýyl-Palestina meselesiniň iki döwetli çözgüde laýyklykda çözülmegini maksat edinýär.
AFP habarlar gullugynyň berýän habaryna görä, Saud Arabystanyň Daşary işler ministri Faýsal bin Farhanyň ýolbaşçylygyndaky resmi wekiliýet Günbatar Şerianyň Ramallah şäherine sapar gurar.
Bu sapar Saud Arabystanyndan Daşary işler ministri derejesinde 1967-nji ýylda sebitiň Ysraýyl tarapyndan basylyp alynmagyndan soň guraljak ilkinji sapar bolar.
