Stambulda geçirlen parahatçylyk gepleşiklerine Russiýanyň adyndan gatnaşan Kirill Dmitriýew, Türkiýäniň töwellaçylyk etmeginde russiýaly we ukrainaly wekiliýetleriň arasynda geçirlen gepleşiklerde ýesir çalşygy taýdan diýseň möhüm ylalaşygyň gazanylandygyny we atyşygyň bes edilmegi meselesiniň seljerlendigini aýtdy.
Dmitriýew, şu gün irden beren beýannamasynda, Stambulda geçirlen duşuşykda gepleşikleriň dowam etdirilmegi taýdan ylalaşyk gazanylandygy nygtady we munyň ABŞ-nyň Prezidenti Trampyň we onyň topary bolmazdan mümkin bolmajakdygyny nygtady.
Stambul gepleşiklerine gatnaşan Dmitriýew şol bir wagtda Russiýanyň baýlyk gaznasynyň başlygy.
Anna güni Stambulda Türkiýäniň ýer eýeçiliginde Russiýa bilen Ukrainanyň arasyndaky söweşiň bes edilmegi maksady bilen ýokary derejeli parahatçylyk gepleşikleri geçirildi.
Türkiýäniň Daşary işler ministri Hakan Fidan gepleşikleriň başynda eden çykyşynda “Parahatçylyk üçin bu pursatdan ýerlikli peýdalanylmaly. Söweşiň uzamagy adam pidalarynyň artmagyna sebäp bolýar” diýdi.
Hakan Fidan, gepleşiklerden soň beren beýannamasynda, Türkiýäniň töwellaçylyk etmeginde geçirlen gepleşikleriň iki tarapdan 1000 ýesiriň çalşylmagy we atyşyň bes edilmegi şertleriniň kesgitlenilmegi bilen netijelenendigini aýtdy.
Stambulda eden çykyşynda Türkiýäniň diplomatiýada oýnaýan roly hakynda öwrülip sözler aýdan Prezident R. T. Erdogan, ýurduň dünýäde parahatçylyk diplomatiýasyna öňbaşçylyk edýändigini belledi.
Esasy gatnaşyjylar
Stambulda geçirlen parahatçylyk gepleşiklerine ABŞ-nyň adyndan Döwlet sekretary Marko Rubio, ABŞ-nyň Türkiýedäki ilçisi Tom Barrak we ABŞ-nyň Ukraina boýunça ýörite wekili general Kellog gatnaşdy.
Ukrainanyň adyndan gepleşiklere Prezidentiň diwanynyň iş dolandyryjysy Andriý Ýermak, Goranmak ministri Rustem Omerow we Daşary işler ministri Andriy Sibiha gatnaşdy.
Türkiýäniň adyndan gepleşiklere Milli howpsuzlyk gullugynyň başlygy Ibrahim Kalyn gatnaşdy.
Beýleki tarapdan Ukrainanyň Prezidenti Zelenskiý düýn ABŞ-nyň we Fransiýanyň Prezidenti, Germaniýanyň Federal Kansleri, Britaniýanyň we Polşanyň Premýer-ministrleri bilen telefon arkaly söhbetdeşlik geçirdi.
Zelenskiý, Stambulda geçirilen gepleşikleriň atyşygyň bes edilmegi boýunça ylalaşyk gazanylmagyny we uzak möhletli çözgüt üçin amatly şertiň döredilmegini maksat edinýändigini aýtdy.
Zelenskiý “Ukraina parahatçylyk üçin ähli taraplaýyn tagalla etmäge taýar” diýdi.
Russiýa doly we şertsiz atyşygyň bes edilmegini kabul etmän halatynda Moskwa garşy giň gerimli sanksiýalaryň goýulmalydygyny nygtan Zelenskiý “Söweşi bes etmäge taýar bolýança Russiýa basyş edilmeli” diýdi.
Ýesir çalşygy ylalşygy we atyşygyň bes edilmegi gepleşikleri
Ukrainanyň Goranmak ministri Rüstem Umerow, düýn beren beýannamasynda, Russiýa bilen Ukrainanyň söweşiň başlan gününden bäri iň uly ýesir çalşygy ylalaşygyny gazanandygyny mälim etdi.
Stambulda metbugata beýannama beren Umerow “Gepleşikler tamamlandy. Atyşygyň bes edilmegi we ýesir çalşygy hakynda pikir alyşdyk. 1000 ýesir bilen 1000 ýesiriň çalşylmagy boýunça ylalaşyk gazandyk” diýdi.
Umerow ýesir çalşygy üçin wagtyň kesgitlenendigini emma häzirki pursatda hiç hili maglumatyň berilmejekdigini belledi.
Ukraina bilen geçirlen gepleşiklerde rus wekiliýetine ýolbaşçylyk eden Wladimir Medinskiý, resmi Moskwanyň gepleşikleriň netijesine umuman kanagatlanma bildirýändigini we aragatnaşyk saklamaga dowam etjekdigini aýtdy.
