Italiýanyň oppozisiýasyndaky Bäş ýyldyzly hereketiň lideri Juzeppe Konte penşenbe güni beren beýanatynda Gaza garşy guraýan hüjümleri sebäpli Ysraýyla garşy giň gerimli ýarag embargosynyň goýulmagy barada çagyryş berdi.

“Diňe 24 sagadta 100-den gowrak adam ýogaldy. Iki hepdäniň dowamynda öldürilen 300-den gowrak çaga bar” diýip aýdan Juzeppe Konte, Ysraýylyň saglygy goraýyş desgalaryny we ýaşaýyş öýleri nyşana almaga dowam edýändigini ýatlatdy.

Ol Italiýanyň we Ýewropanyň Ysraýylyň Premýer-ministri Benýamin Netanýahunyň hökümetiniň eden wagşyçylygyna garşy dymýandygyny aýtdy. Konte Ýewropa Parlamentiniň hem çemeleşmesini ýazgaryp, diňe aladalandyryjy sözüniň manysyzdygyny beýan etdi.

2018-2021-nji ýyllar aralygynda premýer-ministr wezipesinde işlän 60 ýaşly syýasatçy: “Ysraýyla doly ýarag embargo goýulmalydyr we hökümet resmilerine hem-de olaryň tarapdarlaryna agyr ykdysady we diplomatik sanksiýalar girizilmelidir” diýip belledi.

Italiýanyň demirgazygyndaky Milan şäherinde ýüzlerçe adam Gazada palestin žurnalistleriniň Ysraýyl tarapyndan öldürilmegine garşy protest geçirdi.

2023-nji ýylyň oktýabryndan bäri Ysraýylyň Gazada guraýan hüjümleriniň netijesinde aglabasy çagalardan we zenanlardan ybarat 50500-den gowrak palestinaly ýogaldy.

Halkara Jenaýat Kazyýeti geçen ýylyň noýabr aýynda Ysraýylyň Premýer-ministri Benýamin Netanýahu we ýurduň ozalky Goranmak ministri Ýoaw Gallant üçin Gazada uruş jenaýatlary we adamzada garşy jenaýatlar sebäpli tussag ediş kararyny çykardy.

Ysraýyl mundan başagda Halkara Adalat Kazyýetinde bu sebitdäki urşy sebäpli genosid işi bilen ýüzbe-ýüzdir.