DÜNÝÄ
2 minut okamak
Mýanmada ýer titremede ýogalanlar üçin hormatly dymyşlyk edildi
Ýerli wagt bilen 12:51:02-de (0621 GMT) ýer titremäniň bolan wagty ýer titremede ýogalanlary hatyralamak üçin hormatly dymyşlyk edildi
Mýanmada ýer titremede ýogalanlar üçin hormatly dymyşlyk edildi
3 апреля 2025 г.

Mýanmada sişenbe güni bolan ýer titremesinde pida bolanlary hatyralamak üçin hormatly dymyşlyk edildi. Betbagtçylyk 2 müňden gowrak adamyň ýogalmagyna, ýollara we binalara uly zeper ýetirdi.

7.7 bal ululygyndaky ýer titremesi sebäpli Mýanmada harabarlyklaryň aşagynda henizem köp sanly adamyň bardygy nygtalýar.

Halk ýykylan öýlerine girmekden gorkýar. Halkyň bir bölegi ýer titremesiniň dowam etmegine alada bildirýär we köçelerde garaşýar.

Anna güni ýerli wagt bilen 12:51:02-de (0621 GMT) ýer titremäniň bolan wagty, betbagtçylykda ýogalanlary hatyralamak üçin hormatly dymyşlyk edildi.

Mandalay şäheri, 1.7 million ilaty bilen ýurduň ikinji uly şäheri. Ýer titremesi şähere uly zeper ýetirdi. Sky Villa ýaşaýyş toplumy ýaly ýerlerde gözleg we halas ediş işlerine gatnaşýanlar betbagtçylykda ýogalanlary hatyralady.

Ýer titremesi sebäpli ýurtda bir hepde möhlet bilen milli ýas yglan edilipdi. Döwlet eýeçiligindäki edaradyr kärhanalarda milli ýas sebäpli 6-njy aprele çenli baýdaklar ýarysyna çenli aşakladylar.

 Harby häkimiýetleriň berýän maglumatyna görä,  betbagtçylykda 2,056 adam ýogaldy, 3,900-den gowrak adam ýaralandy we 270 adam ýitdi. Ýer titremesinde ýogalanlaryň sanynyň artmagyna alada bildirilýär.

Ýer titremesi sebäpli goňşy  ýurt Taýlandda hem azyndan 20 adam ýogaldy.

Gözleg we halas ediş işleri güýçli depginde dowam edýär. Daşary ýurtlardan gelen müň adamlyk halas ediş topary 650 adamı halas etdi.

 Döwlet metbugaty Global New Light of Myanmar gazetiniň habaryna görä, ölenleriň arasynda anna namazyny okaýan 500 töweregi musulman hem bar.

Ýer titremeden öň hem 50 million ilaty bolan Mýanma dört ýyldan bäri dowam edýän içerki urşy sebäpli uly kynçylyk çekýärdi. BMG-nyň berýän maglumatyna görä, 3.5 million adam uruş sebäpli öýlerini terk etdi.

Gyzyl Haç we Gyzyl Ýarymaý jemgyýetleriniň Halkara Federasiýasy halka gyssagly ynsanperwer kömeginiň berilmegi üçin 100 million dollar kömek üçin çagyryşyny berdi.

 

TRT Global barada gysgaça syn. Pikirleriňizi ýazyň!
Contact us