Ýewropa Bileleşiginiň wekilleri ABŞ-nyň Halkara Jenaýat kazyýetiniň 4 kazysyna sanksiýa girizmek baradaky kararyndan soň kazyýeti goramak üçin beýannama berdiler.

Ýewropa Komissiýasynyň başlygy Ursula fon der Lýaýen anna güni X platformasyndan beren beýannamasynda, komissiýanyň kazyýeti we resmilerini “dolulygyna goldaýandygyny” habar berdi.

Ýewropa Komissiýasynyň başlygy Ursula fon der Lýaýen: “Kazyýet basyş astynda bolmadan erkin hereket edip bilmelidir” diýip nygtady.

Ýewropa Geňeşiniň başlygy Antonio Kosta hem şoňa meňzeş beýannama berip, kazyýeti “halkara adalatyň esasy daýanjy” diýip häsýetlendirdi.

Antonio Kosta: “Halkara Jenaýat kazyýeti halklara garşy däl, jezasyzlyga garşydyr. Garaşsyzlygyny we bütewiligini goramalydyrys. Kanunyň güýji güýçlüniň kanunyndan üstün bolmalydyr” diýip belledi.

Ýewropa Bileleşiginiň Daşary syýasat boýunça ýolbaşçysy Kaýa Kallas hem kazyýete goldaw berip, garaşsyzlygyň we adalata bolan garaşlylygyň ähmiýetini nygtap geçdi.

Kaýa Kallas: “Halkara Jenaýat kazyýeti iň agyr jenaýatlara garşy adalaty goraýar. Ol basyşdan azat we öz ýörelgelerine wepaly bolmalydyr” diýip nygtady.

2024-nji ýylyň noýabr aýynda Halkara Jenaýat kazyýeti Ysraýylyň Premýer-ministri Benýamin Netanýahuny we öňki Goranmak ministri Ýoaw Gallanty Gazada uruş jenaýatlaryny we adamzada garşy jenaýatlary amala aşyrmakda aýyplap, tussag etmek barada karara geldi.