“ABŞ-nyň Döwlet sekretary Marko Rubio Ermenistan bilen Azerbaýjanyň arasynda ýaraşyk şertnamasy boýunça gazanylan ylalaşyga kanagatlanma bildirdi we sebitiň uzak möhletleýin howpsuzlygy hem-de gülläp ösmegi üçin onuň ähmiýetini nygtady” diýip, Döwlet departamenti habar berdi.

“Sekretaryň Azerbaýjan bilen ýaraşyk şertnamasy boýunça gazanylan ylalaşygy gutlap, sebitleýin konfliktleriň üznüksizligini ortadan aýyrmak we Günorta Kawkazda howpsuzlygy hem-de gülläp ösüşi üpjün etmek üçin uzak möhletleýin parahatçylygyň ähmiýetini nygtandygyny” Döwlet departamentiniň metbugat sekretary Temmi Brýus sişenbe güni Rubionyň Ermenistanyň Premýer-ministri Nikol Paşinýan bilen geçirilen telefon söhbetdeşliginden soň beýan etdi.

“Rubio bilen Paşinýan Günorta Kawkazda islendik görnüşdäki dartgynlygyň ýokarlanmagynyň kabul ederliksizdigi hakynda ylalaşdylar”, diýlip beýanatda bellenilýär.

Şeýle hem söhbetdeşler öz ýurtlarynyň strategik hyzmatdaşlar hökmünde umumy bähbitlerini ara alyp maslahatlaşdylar we ikitaraplaýyn hyzmatdaşlygy özdürmek baradaky borçnamalaryny tassykladylar, diýlýär.

Telefon arkalyk söhbetdeşlik Azerbaýjan bilen Ermenistanyň onlarça ýyl dowam eden konflikti ortadan aýyrmak we Bakuw bilen Ýerewanyň arasynda diplomatik gatnaşyklary ýola goýmak üçin ýaraşyk şertnamasynyň taslamasy boýunça ylalaşyga gelendiklerini yglan etmeklerinden birnäçe gün soň geçirildi.