Rus hususy harby kompaniýasy Wagner Mali döwletinden çekilýändigini we Günbatar Afrikadaky üç ýyldan gowrak dowam eden operasiýalaryny tamamlaýandygyny habar berdi.

Wagner anna güni beren beýanatynda: “Biz ýerli watançylara öz topraklaryny gorap biljek güýçli we tertipli goşuny döretmäge kömek etdik. Sebitdäki ähli paýtagtlar kanuny häkimiýetleriň gözegçiligine gaýdyp geldi” diýip habar berdi.

Beýanatda mundan başgada: “Ençeme ýyllap asuda ilaty biynjalyk eden müňlerçe söweşini we serkerdelerini täsirsiz ýagdaýa getirdik” diýip aýan edildi.

Sahel sebitinde ýerleşýän Mali ýurdy 2012-nji ýyldan bäri gozgalaňlara garşy göreş alyp barýardy.

Russiýanyň Afrika Korpusy Wagneriň ornuny tutar

Malidäki harby dolanşyk Fransiýa we beýleki hyzmatdaşlar bilen gatnaşyklaryny kesenden soň, Russiýadan goldaw sorady.

Wagner tarapyndan berilen beýanata garamazdan Russiýanyň günbatar Afrika ýurdundaky barlygyny dowam etdirjekdigi we döwlet gözegçiligindäki harbylaşdyrylan güýç bolan Afrika Korpusynyň işe girişjekdigi aýdylýar.

Harby dolanşygyndaky üç ýurt bolan Mali, Burkina-Faso we Niger şu ýylyň başynda Günbatar Afrika sebitleýin blogy bolan EKOWAS-dan resmi taýdan çykdy.

Ady agzalan ýurtlar Sahel döwletleri alýansy ady bilen öz blogyny döretdiler.