Rossiyaning sharqiy Ukrainadagi Dnipro shahriga qarshi insonsiz havo vositasi orqali uyushtirgan hujumi oqibatida kamida to‘rt kishi halok bo‘lar ekan, yigirma bir kishi tan jarohati oldi. Hujum oqibatida ko‘p qavatli binolar ham ziyon ko‘rar ekan, bir mehmonxona, yoqilg‘i quyish stansiyasi va uylarda yong‘in kelib chiqdi.

Rossiya bilan Ukraina havo hujumlarini kuchaytirar ekan, AQSh Prezidenti Donald Tramp Kreml bilan Kiyevni uch yildan ortiq davom etayotgan urushni to‘xtatishga ko‘ndirishga, shu doirada o‘q uzishni to‘xtatishga undamoqda.

Dnipropetrovsk viloyati gubernatori Sergiy Lisak, Rossiya tomonidan juma kuni kechqurun Dniproga yigirmadan ortiq dron yuborilganini ma’lum qildi.

Lisakning so‘zlariga ko‘ra, to‘rt kishi halok bo‘lgan va shanba kuni tong sahardan e’tiboran yaradorlar soni 21 nafarga yetgan.

“Bu yirik hujum keng ko‘lamli vayronagarchilik va yong‘inlarga yo‘l ochdi. Mehmonxona va restoran majmuasi, 11 ta xususiy uy, garajlar va yoqilg‘i quyish stansiyasi yonib ketdi”, - degan Lisak, ko‘p qavatli binolar bilan avtomobillar ham ziyon ko‘rganini o‘z so‘ziga ilova etdi.

Yong‘inlar o‘chirilganiga ham e’tibor qaratgan Lisak, qurbonlarning oilalariga hamdardlik bildirdi.

Donetskdagi aholi punkti Rossiya tomonidan egallab olindi

Boshqa jihatdan Rossiya Mudofaa vazirligi, Rossiya kuchlarining Ukraina sharqidagi Donetsk viloyatida joylashgan Panteleymonivka aholi punkti bilan Zaporojye viloyatidagi Shcherbakiy qisjlog‘ini egallab olganini ma’lum qildi.

Juma kuni Rossiya Davlat rahbari Vladimir Putin Ukrainada “o‘tish jarayoni ma’muriyati” joriy etilishini talab qilib, rus armiyasi Ukraina armiyasini butunlay mag‘lubiyatga uchratishini ifoda etdi.

Ukraina Prezidenti Volodimir Zelenskiy esa Putinning o‘tish jarayoni talabini, tinchlik kelishuvini kechiktirishga qaratilgan navbatdagi hiyla - nayrang sifatida baholab, rad etdi.