Xalqaro hamjamiyat Isroilning Eronning asosiy yadroviy va raketa obyektlariga qarshi keng ko‘lamli harbiy hujumlariga keskin munosabat bildirdi. Ushbu hujumlar natijasida Eron armiyasi boshlig‘i Muhammad Boqiriy va Inqilobiy Gvardiya boshlig‘i Husayn Salomiy halok bo‘ldi.

Bu misli ko‘rilmagan keskinlik Birlashgan Millatlar Tashkiloti, yirik davlatlar va Yaqin Sharqdagi mintaqaviy manfaatdor tomonlar tomonidan zudlik bilan vaziyatni yumshatish va ehtiyotkorlikka chaqiruvlarga sabab bo‘ldi.

BMT bosh kotibi Yaqin Sharqdagi keskinlikni qoraladi

BMT bosh kotibi Antoniu Guterrish payshanba kuni kechqurun Isroilning Eron obyektlariga qarshi hujumlari fonida Yaqin Sharqdagi keskinlikni qoralab bayonot berdi.

“Bosh kotib Yaqin Sharqdagi har qanday harbiy keskinlikni qoralaydi,” dedi Guterrishning vakili Farhan Haq bayonotida.

Bayonotda Guterrish “Eron va AQSh o‘rtasida Eronning yadroviy dasturi bo‘yicha muzokaralar davom etayotgan bir paytda Isroilning Eronning yadroviy obyektlariga hujumlaridan alohida xavotirda ekanini” ta’kidladi.

BMT a’zolarini “BMT nizomi va xalqaro huquqqa muvofiq harakat qilishga” chaqirgan holda, bayonotda bosh kotib “ikki tomon ham maksimal ehtiyotkorlik ko‘rsatib, chuqurroq mojaroga tushib qolishdan qochishi kerakligini” aytdi.

Isroil bosh vaziri Benyamin Netanyaxu YouTube’da e’lon qilingan nutqida o‘z kuchlari “Eronning yadroviy boyitish dasturining yuragiga zarba berganini” aytdi.

Bu orada, Eron davlat ommaviy axborot vositalari Isroil hujumlari natijasida Eron Inqilobiy Gvardiyasi qo‘mondoni general Husayn Salomiy halok bo‘lganini xabar qildi.

Eronning oliy rahbari Ali Xomanaiy Isroilga “qattiq jazolash” bilan javob berishini va’da qildi.

“Sionistik rejim bugun tongda bizning aziz mamlakatimizda jinoyat sodir etdi. U o‘zining yovuz tabiatini yanada oshkor qilib, yashash hududlarini nishonga oldi,” dedi Xomanaiy.

‘O’ta xavfli lahzalar’: Britaniya tashqi ishlar vaziri

Britaniya tashqi ishlar vaziri Devid Lammi Isroilning Eron hududidagi tungi hujumlarini “xavfli lahza” deb atab, barcha tomonlarni ehtiyotkorlikka chaqirdi.

Saudiya Arabistoni Isroilning Eronni nishonga olgan hujumlarini qoraladi

Tehron bilan ikki yil avval yarashgan Saudiya Arabistoni ham Isroilning hujumlarini qoraladi.

“Saudiya Arabistoni birodar Islomiy Eron Respublikasiga qarshi Isroilning suverenitet va xavfsizlikni buzuvchi, xalqaro qonun va me’yorlarga zid bo‘lgan hujumlarini qat’iy qoralaydi,” deyiladi qirollik tashqi ishlar vazirligi bayonotida.

Tramp Eron bilan yadroviy muzokaralarni qayta boshlashga umid qilmoqda

AQSh prezidenti Donald Tramp Isroilning Tehron va boshqa Eron shaharlariga qarshi keng ko‘lamli havo hujumlaridan so‘ng Eronni muzokara stoliga qaytarishga umid qilayotganini aytdi.

Fox News kanali milliy xavfsizlik bo‘yicha bosh muxbiri Jennifer Griffinning yozishicha, Tramp Isroil hujumlari haqida oldindan xabardor bo‘lgan, ammo AQSh harbiylari bu hujumlarda ishtirok etmaganini ta’kidlagan.

AQSh Markaziy Qo‘mondonligi (CENTCOM) yuqori tayyorgarlik holatiga keltirilgan, agar javob zarbalari bo‘lsa, AQSh o‘zini va Isroilni himoya qilishga tayyor.

Yaponiya Isroilning Eronni nishonga olgan hujumlarini qattiq qoraladi

Yaponiya tashqi ishlar vaziri Takeshi Ivaya payshanba kuni Tokioda jurnalistlarga Isroilning Eronni nishonga olgan hujumlarini qattiq qoralab, barcha tomonlarni ehtiyotkorlikka chaqirdi.

“Biz ushbu vaziyatni yanada keskinlashtiruvchi harakatlarni qattiq qoralaymiz,” dedi u.

Iordaniya barcha parvozlar uchun havo hududini yopdi

Iordaniya hukumati vakili Muhammad al-Momani qirollik havo hududining buzilishiga yo‘l qo‘yilmasligini aytdi.

“Qirollik o‘z xavfsizligi va fuqarolarining tinchligini tahdid qiluvchi har qanday urinishlarga yo‘l qo‘ymaydi,” dedi u.