AQSh Prezidenti Donald Tramp Isroil Bosh vaziri Benyamin Netanyaxuga Turkiya bilan bog‘liq har qanday nizolar bo‘yicha “oqilona bo‘lishi kerakligini” aytganini ma’lum qildi. Shu bilan birga, Tramp Turkiya Prezidenti Rajab Toyyib Erdo‘g‘on bilan bo‘lgan munosabatlarini ham yuqori baholadi.

“Turkiya bilan bog‘liq har qanday muammoingizni hal qila olaman, deb o‘ylayman. Ya’ni, siz oqilona bo‘lishingiz kerak, biz ham oqilona bo‘lishimiz kerak,” dedi Tramp Oq uyda Netanyaxuni qabul qilganida jurnalistlarga.

“Bibi, agar Turkiya bilan muammoingiz bo‘lsa, menimcha, siz uni hal qila olasiz. Bilasizmi, men Turkiya va ularning yetakchisi bilan juda yaxshi munosabatdaman va biz bu masalani hal qila olamiz, deb o‘ylayman. Shunday ekan, bu muammo bo‘lmaydi, deb umid qilaman. Menimcha, bu muammo bo‘lmaydi,” dedi u, Netanyaxuni laqab bilan atab.

Tramp Erdo‘g‘on bilan “zo‘r munosabatlar”ga ega ekanligini aytib, uni “qattiqqo‘l inson, juda aqlli va hech kim uddalay olmagan ishni amalga oshirdi,” deb ta’rifladi. Bu bilan u o‘tgan yil dekabr oyida Suriyaning sobiq rejim rahbari Bashar al-Asadning qulashida Turkiyaning roli haqida gapirganini eslatdi.

Tramp avvalroq Turkiyani yaxshi mamlakat, Erdo‘g‘onni esa yaxshi yetakchi sifatida e’tirof etgan edi.

Elchilar nomzodlari yig‘ilishida Tramp Turkiyani maqtaganidan so‘ng, ulardan biriga qarata: “Yaxshi joy, yaxshi yetakchi ham,” deb javob bergan edi.