Ukraina Prezidenti Volodimir Zelenskiy aytishicha, Ukraina dushanba kuni Istanbulda Rossiya tomonidan taklif qilingan uchrashuvda ishtirok etadi.
"Men dushanba kuni Istanbulda bo‘lib o‘tadigan uchrashuv oldidan (Ukrainaning) pozitsiyalarini belgilab oldim," deb yozdi Zelenskiy Telegramda o‘z rasmiylari bilan uchrashuvdan so‘ng.
U qo‘shimcha qildi, Ukraina delegatsiyasiga yana Mudofaa vaziri Rustem Umerov boshchilik qiladi.
Rossiya Ukrainaga 472 ta dronbilan hujum qildi
Tunda Rossiya Ukrainaga qarshi 472 ta dron uchirdi, bu urush davomida bir kechada eng ko‘p uchirilgan dronlar soni bo‘ldi, deb xabar berdi Ukraina havo kuchlari.
Havo kuchlari bayonotida aytilishicha, Rossiya yetti raketa ham uchirgan. Shuningdek, 382 ta dron va uchta raketa urib tushirilgani yoki zararsizlantirilgani qo‘shimcha qilindi.
Rossiya yaqinda Ukrainaga qarshi kechasi muntazam ravishda uchiriladigan dronlar sonini oshirdi.
Rossiyaning yadroviy qurol tashishga qodir bombardimonchilariga hujum
Yakshanba kuni Ukraina Rossiyaning Sibirda joylashgan harbiy bazasidagi yadroviy qurol tashishga qodir uzoq masofali bombardimonchilariga hujum qildi. Bu front chizig‘idan 4,300 km (2,670 mil) uzoqlikdagi birinchi bunday hujum bo‘ldi, deb xabar berdi Rossiyaparast blogerlar.
Ijtimoiy tarmoqlarda tarqalgan tasdiqlanmagan video va suratlarda Rossiyaning strategik bombardimonchilari - uzoq masofadagi nishonlarga yadroviy bomba tashlash uchun mo‘ljallangan samolyotlar - Irkutsk shimolidagi Belaya aviabazasida yonayotganini ko‘rish mumkin.
Kiyevda Reuters agentligiga anonim tarzda gapirgan Ukraina manbasi aytishicha, zarba berilgan samolyotlar orasida Tu-95 va Tu-22 strategik bombardimonchilari bo‘lgan, ular Rossiya tomonidan Ukrainaga uzoq masofali raketalar uchirish uchun ishlatiladi.
Irkutsk gubernatori Igor Kobzev Usolskiy tumanidagi Sredniy qishlog‘i yaqinidagi harbiy qismga dron hujumi bo‘lganini aytdi, lekin strategik aviatsiya haqida gapirmadi.
U Telegramda joylashtirgan videoda dronlarning osmonda uchib o‘tayotgani va ulkan tutun bulutlari ko‘tarilayotgani eshitiladi va ko‘rinadi.
U bu Sibirning o‘sha qismida birinchi bunday hujum bo‘lganini aytdi va hujumda qancha dron ishtirok etgani noma’lumligini qo‘shimcha qildi. Dronlar yuk mashinasidan uchirilganini ham ta’kidladi.
