Isroil seshanba kuni o‘z kuchlari tomonidan Eronning yangi tayinlangan Xotam al-Anbiya Markaziy shtabining rahbari Ali Shadmanining o‘ldirilganini e’lon qildi.

Shadmani bir necha kun oldin Oliy yetakchi Ali Xomanaiy tomonidan ushbu lavozimga tayinlangan edi.

“Razvedka boshqarmasi tomonidan olingan aniq ma’lumotlar va kechasi yuzaga kelgan kutilmagan imkoniyat tufayli Harbiy-havo kuchlari qiruvchi samolyotlari Tehron markazidagi boshqaruv shtabiga hujum qilib, Ali Shadmanini, Harbiy shtab boshlig‘i va eng yuqori darajadagi harbiy qo‘mondonni yo‘q qildi,” deb yozdi Isroil armiyasi o‘zining X ijtimoiy tarmog‘idagi sahifasida.

Shadmanining vazifalari jangovar operatsiyalarni nazorat qilish, raketa va dron hujumlarini tasdiqlash hamda Eronning Isroilga qarshi harbiy strategiyasini shakllantirishni o‘z ichiga olgan.

U o‘tgan hafta Isroil hujumi natijasida o‘ldirilgan general-leytenant G‘ulomali Rashidning o‘rnini egallagan edi.

“Shadmanining yo‘q qilinishi Eronning yuqori harbiy qo‘mondonligiga qaratilgan qator operatsiyalarning bir qismi bo‘lib, Eron qurolli kuchlarining boshqaruv zanjiriga yana bir zarba berdi,” dedi Isroil armiyasi.

Isroil rasmiylari operatsiya haqida qo‘shimcha tafsilotlarni oshkor qilmadi.

Tehron esa Shadmanining o‘limi bo‘yicha hali izoh bermadi.