Isroil Knesseti (parlamenti)ni tarqatib yuborish to‘g‘risidagi qonun loyihasi bo‘yicha ovoz berishga tayyorlanmoqda. Ushbu qonun loyihasi muxolifat partiyalari tomonidan kiritilgan.
Chorshanba kuni muxolifat partiyalari bayonot berib, Knessetni tarqatib yuborish to‘g‘risidagi qonun loyihasini kiritish qarori “bir ovozdan qabul qilingan va barcha fraksiyalar uchun majburiy” ekanini ma’lum qildi.
“Bundan tashqari, barcha fraksiyalar o‘rtasidagi kelishuvga ko‘ra, barcha e’tiborni bitta maqsadga – hukumatni ag‘darishga qaratish uchun muxolifat qonunchilik tashabbuslarini kun tartibidan chiqarishga qaror qilindi,” deyiladi bayonotda.
Qonun loyihasini qo‘llab-quvvatlovchilar Knessetni tarqatib yuborish va muddatidan oldin saylovlarni o‘tkazish uchun ultra-pravoslav partiyalarni qo‘llab-quvvatlashga erishmoqchi.
Muxolifat allaqachon 120 o‘rinli Knessetda yetti o‘ringa ega bo‘lgan “United Torah Judaism” (UTJ) bloki qo‘llab-quvvatlashini qo‘lga kiritgan.
Shu bilan birga, 11 o‘ringa ega bo‘lgan Shas partiyasi qonun loyihasini qo‘llab-quvvatlaydimi yoki yo‘qmi, hali aniq emas.
Isroilning Channel 13 telekanali xabariga ko‘ra, Shas partiyasi Bosh vazir Benyamin Netanyaxuning Harediy yahudiylarni majburiy harbiy xizmatdan ozod qilish to‘g‘risidagi qonunni qabul qila olmagani sababli qonun loyihasining dastlabki o‘qilishida Knessetni tarqatib yuborish uchun ovoz beradi.
Hozirgi hukumat koalitsiyasi 68 o‘ringa ega bo‘lib, hokimiyatda qolish uchun kamida 61 o‘ringa muhtoj.
Ultra-pravoslav jamoalar 2024-yil 25-iyun kuni Oliy sud tomonidan qabul qilingan qarorga ko‘ra harbiy xizmatga chaqirilishga majbur qilinishi va xizmatdan bosh tortgan diniy muassasalarga moliyaviy yordam taqiqlanishiga qarshi norozilik bildirishda davom etmoqda.
Harediylar Isroilning 10 million aholisi orasida taxminan 13 foizni tashkil qiladi. Ular diniy sabablarga ko‘ra harbiy xizmatga qarshi chiqib, Tavrotni o‘rganish ularning asosiy burchi ekanini va dunyoviy jamiyatga integratsiya qilish ularning diniy o‘zligini va jamoa birligini xavf ostiga qo‘yishini ta’kidlaydi.
Qonun loyihasi Isroil armiyasi 2023-yil oktabr oyidan beri G‘azoga qarshi shafqatsiz hujumlarni davom ettirayotgan bir paytda kiritildi. Ushbu hujumlar natijasida deyarli 55 ming falastinlik, asosan ayollar va bolalar halok bo‘ldi.
Isroil muxolifati Netanyaxuni G‘azo urushini o‘zining o‘ta o‘ng qanot koalitsiya hamkorlarini tinchlantirish va hokimiyatda qolish uchun cho‘zayotganlikda aybladi.
O‘tgan yil noyabr oyida Xalqaro Jinoyat Sudi Netanyaxu va uning sobiq Mudofaa vaziri Yoav Gallantga G‘azodagi urush jinoyatlari va insoniyatga qarshi jinoyatlar uchun hibsga olish orderlarini chiqardi.
Shuningdek, Isroil G‘azodagi tinch aholi ustidan sodir etilgan urush jinoyatlari uchun Xalqaro Sudda genotsid ishi bo‘yicha javobgar bo‘lishi mumkin.
