Turkiya va Ozarbayjon o‘rtasidagi energetika sohasidagi hamkorlik nafaqat ikki davlatga foyda keltiradi, balki mintaqa va Yevropa energetika xavfsizligini ham mustahkamlaydi, dedi Turkiya Prezidenti Rajab Toyyib Erdo‘g‘on Boku Energetika Haftasiga yuborgan xabarida.
Erdo‘g‘on dushanba kuni Ozarbayjon poytaxti Bokuda o‘tkazilayotgan Boku Energetika Haftasida Turkiya Energetika va tabiiy resurslar vaziri Alparslan Bayraktar tomonidan o‘qib eshittirilgan xabarida, so‘nggi global geosiyosiy voqealar Turkiya-Ozarbayjon energetika xavfsizligi bo‘yicha hamkorligining ahamiyatini yana bir bor ta’kidlaganini aytdi.
“Boku-Tbilisi-Jayhon va Janubiy Kavkaz (Boku-Tbilisi-Erzurum quvurlari deb ham ataladi) hamda Trans-Anadolu tabiiy gaz quvuri (TANAP) kabi asosiy infratuzilma loyihalari bilan belgilangan bu hamkorlik nafaqat Turkiya va Ozarbayjonga foyda keltiradi, balki mintaqa va Yevropa energetika xavfsizligini mustahkamlashda davom etmoqda,” dedi Erdo‘g‘on.
Turkiya Prezidenti mart oyida foydalanishga topshirilgan Ig‘dir-Naxchivan quvuri ikki davlat o‘rtasidagi uzoq muddatli va muvaffaqiyatli energetika hamkorligining so‘nggi namunasi ekanini ta’kidladi.
“Quvur ishga tushirilishi bilan Naxchivan mintaqasida energiya ta’minoti xavfsizligi mustahkamlandi va bizni birgalikda kuchliroq qildi,” dedi u.
Strategik loyihalar
Erdo‘g‘on Turkiya va Ozarbayjon o‘rtasidagi elektr energiyasi aloqalarini oshirish yana bir strategik ahamiyatga ega loyiha ekanini qo‘shimcha qildi.
Turkiya va Naxchivan, shuningdek, Turkiya va Gruziya o‘rtasidagi bog‘lanish quvvatlarini oshirish zarurligini ta’kidlagan Erdo‘g‘an shunday dedi:
“Biz Turkiya, Ozarbayjon, Gruziya va Bolgariya o‘rtasida yangi elektr energiyasi aloqasi liniyasini tashkil etish uchun yashil elektr energiyasini uzatish va savdo bo‘yicha hamkorlik to‘g‘risida memorandum imzoladik”
“Bu loyiha mintaqamiz energetika xavfsizligi va farovonligi uchun yana bir tarixiy qadam bo‘lib, uni imkon qadar tezroq yakunlashni maqsad qilganmiz,” deya qo‘shimcha qildi Turkiya yetakchisi.
Erdo‘g‘an ayni vaqtda ikki davlat o‘rtasida yangi tabiiy gaz loyihalari uchun katta salohiyat mavjudligini aytdi.
“Ozarbayjon uzoq yillardan beri Turkiya va Yevropaga katta hajmda gaz yetkazib berib kelmoqda va global energetika bozorida strategik rol o‘ynaydi, ayniqsa hozirgi sharoitda bu rol juda muhim,” deb tushuntirdi Prezident.
“Kelgusi davrda, Ozarbayjon va Turkiya orqali Turkman gazini eksport qilish bo‘yicha hamkorlikni kuchaytirish uchun muhim imkoniyatga egamiz. Bu loyiha ta’minot yo‘llarini diversifikatsiya qilishga yordam beradi va mintaqaviy farovonlikka hissa qo‘shadi”,- dedi u.
