Birlashgan Qirollik kamida 12 ta yadro qurolini tashishga qodir bo‘lgan F-35A qiruvchi samolyotlarini sotib olishni va NATOning havo yadro missiyasiga qo‘shilishni rejalashtirmoqda.

Bosh vazir Keyr Starmer chorshanba kuni Niderlandiyada bo‘lib o‘tadigan NATO sammitida ushbu e’lonni qilishni va alyans a’zolarini o‘z majburiyatlarini kuchaytirishga chaqirishni rejalashtirgan, deya xabar beradi rasmiy matbuot xizmati.

F-35A qiruvchi samolyotlari oddiy qurollarni tashishga qodir bo‘lsa-da, zarurat tug‘ilganda AQShda ishlab chiqarilgan yadro bombalari bilan jihozlanishi mumkin.

Asosan AQShning Lockheed Martin kompaniyasi tomonidan ishlab chiqarilgan ushbu beshinchi avlod qiruvchi samolyoti dunyodagi eng ilg‘or harbiy samolyotlardan biri hisoblanadi, ammo u eng qimmat samolyotlardan biri hamdir.

“Radikal noaniqlik davrida tinchlikni o‘z-o‘zidan mavjud deb qabul qila olmaymiz, shuning uchun mening hukumatim milliy xavfsizligimizga sarmoya kiritmoqda,” dedi Starmer.

Dauning-strit ushbu qadamni “Birlashgan Qirollikning yadro pozitsiyasini bir avlod ichida eng katta mustahkamlash” deb ta’rifladi.

“Birlashgan Qirollikning NATOga bo‘lgan sadoqati shubhasiz, xuddi alyansning Birlashgan Qirollikni xavfsiz saqlashga qo‘shgan hissasi kabi,” dedi Starmer.

“Ammo biz hammamiz Yevro-Atlantika hududini kelajak avlodlar uchun himoya qilish uchun harakat qilishimiz kerak.”

Shuningdek, u ushbu qaror 100 ta biznesga foyda keltirishi va butun mamlakat bo‘ylab 20,000 ta ish o‘rnini ta’minlashini ta’kidladi, bu esa “bizning dunyoda yetakchi Qirollik Harbiy-havo kuchlarimiz uchun yangi davrni” boshlab beradi.

NATO bosh kotibi Mark Rutte ushbu e’loni “NATOga yana bir kuchli Britaniya hissasi” deb ta’rifladi.