AQSh va Rossiya o‘rtasidagi muzokaralarning ikkinchi bosqichi Istanbulda boshlandi.

AQSh delegatsiyasi payshanba kuni mahalliy vaqt bilan soat 9:45 da (GMT 0645) Istanbuldagi Rossiya Bosh konsulligiga yetib keldi. Muzokaralar ikki davlat elchixonalari faoliyatini normallashtirish masalalariga bag‘ishlangan.

Seshanba kuni AQSh Davlat departamenti vakili Temmi Bryus delegatsiyalar Istanbulda uchrashib, "o‘zaro missiyalar faoliyatini barqarorlashtirishga qaratilgan sa’y-harakatlarni" muhokama qilishlarini ma’lum qildi.

Uning ta’kidlashicha, "kun tartibida siyosiy yoki xavfsizlik masalalari yo‘q" va Ukrainaga oid masalalar "mutlaqo muhokama qilinmaydi."

Muzokaralar Istanbuldagi Rossiya bosh konsulining qarorgohida o‘tkazilmoqda va bir necha soat davom etishi kutilmoqda. Biroq, bu safargi uchrashuv avvalgi bosqichdan qisqaroq bo‘lishi mumkin. Avvalgi bosqich olti soatdan ko‘proq davom etgan edi.

Rossiya delegatsiyasiga Rossiyaning AQShdagi elchisi Aleksandr Darchiyev, AQSh delegatsiyasiga esa Davlat kotibi o‘rinbosari Sonata Koulter rahbarlik qilmoqda.

Uchrashuv oldidan Darchiyev bir qancha masalalarda allaqachon ma’lum bir yutuqlarga erishilganini ma’lum qildi.