Turkiya Eurofighter Typhoon qiruvchi samolyotlarini sotib olish yo‘lida yana bir muhim qadam tashladi. Britaniya bilan erishilgan kelishuvga ko‘ra, Anqara ushbu ilg‘or qiruvchi samolyotlardan foydalanuvchi davlatga aylanishi mumkin.

Turkiya va Britaniya chorshanba kuni Istanbulda bo‘lib o‘tgan Xalqaro Mudofaa Sanoati Yarmarkasi (IDEF 2025) doirasida bu borada o‘zaro anglashuv memorandumini imzolaganliklarini e’lon qilishdi.

Mazkur memorandum Turkiya Milliy Mudofaa vaziri Yashar Guler va Britaniya mudofaa vaziri Jon Xili o‘rtasida o‘tkazilgan yuqori darajadagi uchrashuvdan so‘ng imzolandi. Bu ikki davlat o‘rtasidagi kengroq mudofaa hamkorligiga yo‘l ochuvchi muhim qadam sifatida baholanmoqda.

Turkiya mudofaa vazirligi bayonotiga ko‘ra, kelishuv Turkiyaning Eurofighter integratsiyasi bo‘yicha Britaniya bilan keng qamrovli bitimga erishish yo‘lini belgilaydi.

Mazkur memorandum Turkiya Prezidenti Rajab Toyyib Erdo‘g‘anning Britaniya Bosh vaziri Keyr Starmer bilan ushbu kelishuv bo‘yicha erishilgan yutuqlarni muhokama qilganidan bir kun o‘tib imzolandi.

Turkiya Germaniya, Britaniya, Italiya va Ispaniya konsorsiumi tomonidan ishlab chiqariladigan 40 ta Eurofighter qiruvchi samolyotlarini sotib olish bo‘yicha muzokaralar olib bormoqda.

Anqara ushbu samolyotlarni sotib olish bo‘yicha dastlabki so‘rovini 2023 yil mart oyida taqdim etgan edi.

Eurofighter Typhoon Britaniyada Germaniya tomonidan yetkazib beriladigan qismlar yordamida ishlab chiqariladi va u dunyodagi eng ilg‘or 4.5-avlod qiruvchi samolyotlaridan biri hisoblanadi.

Ushbu kelishuv orqali Turkiya o‘z havo kuchlari imkoniyatlarini diversifikatsiya qilishga bir qadam yaqinlashdi va NATOdagi asosiy ittifoqchilari bilan mudofaa aloqalarini mustahkamladi.

Turkiya NATOdagi ikkinchi yirik harbiy kuchga ega bo‘lib, so‘nggi oylarda bir qancha Yevropa yetakchilari Anqaraning mudofaa salohiyatini alohida ta’kidlab o‘tishdi.