Rossiya va Ukraina o‘rtasida 25 yoshgacha bo‘lgan asirlarni almashtirishning birinchi bosqichi Istanbulda Turkiya mezbonligida o‘tkazilgan muzokaralar natijasida amalga oshirildi.
Rossiya Mudofaa vazirligi dushanba kuni bergan bayonotida, Istanbulda Rossiya va Ukraina o‘rtasida to‘g‘ridan-to‘g‘ri muzokaralar orqali erishilgan kelishuvga muvofiq, 25 yoshgacha bo‘lgan birinchi guruh rossiyalik askarlar Ukrainadan qaytarilganini ma’lum qildi.
Bayonotda aytilishicha, ushbu asir askarlar evaziga taxminan shuncha miqdordagi Ukraina Qurolli Kuchlariga tegishli asirlar Kiyevga topshirilgan. Rossiyalik askarlar hozirda Belarus hududida bo‘lib, ularga zaruriy psixologik va tibbiy yordam ko‘rsatilmoqda.
Bayonotda barcha rossiyalik askarlar davolanish va reabilitatsiya uchun vazirlikning tibbiyot muassasalariga olib kelinishi haqida ma’lumot berildi. Biroq, asirlarni almashtirishda qancha askar ishtirok etgani haqida ma’lumot berilmadi.
Zelenskiyning bayonoti
Ukraina Prezidenti Vladimir Zelenskiy o‘zining Telegram akkauntida bergan bayonotida, Istanbulda erishilgan kelishuvga muvofiq Rossiya bilan asirlarni almashtirish amalga oshirilganini ma’lum qildi.
Zelenskiy asirlarni almashtirish natijasida Ukraina askarlari o‘z uylariga qaytarilganini ta’kidlab, “Bugun almashuv boshlandi va kelgusi kunlarda bir necha bosqichda davom etadi,” dedi.
Zelenskiy ushbu asirlarni almashtirish jarayoni juda nozik va murakkab tarzda amalga oshirilganini, bu borada har kuni muzokaralar olib borilganini aytib, “Hozirda qaytarilayotganlar orasida jarohatlanganlar va og‘ir jarohatlanganlar, shuningdek, 25 yoshgacha bo‘lganlar bor,” dedi.
Zelenskiy barcha ukrainalik asirlarni uylariga qaytarish kerakligini ta’kidlab, “Istanbuldagi muzokaralarda erishilgan gumanitar masalalarga oid kelishuvlar to‘liq amalga oshirilishini kutmoqdamiz. Hamma insonlarni qaytarish uchun qo‘limizdan kelgan barcha ishni qilyapmiz. Bu borada barcha darajalarda ish olib boryapmiz,” dedi.
Rossiya va Ukraina o‘rtasida 2-iyun kuni Istanbulda Turkiya mezbonligida o‘tkazilgan muzokaralar natijasida 6 ming nafar ukrainalik askarning muzlatilgan jasadlarini topshirish, og‘ir jarohatlangan va kasal askarlar hamda 25 yoshgacha bo‘lgan asirlarni almashtirish bo‘yicha kelishuvga erishildi.
