Bir musulmon ayolga qarshi Toronto shahri yaqinidagi davlat kutubxonalaridan birida hujum uyushtirildi. Bu haqida Durham mintaqasi politsiya xodimlari kecha, yakshanba kuni ma’lumot bo‘lishdi.
Ushbu ma’lumotga ko‘ra, musulmon ayol kutubxonada dars qilayotgan edi. To‘satdan unga yaqinlashgan notanish ayol, musulmon ayolga haqorat qilib, boshiga nimalardir uloqtira boshlagan. Ortidan qo‘lidagi chaqmoq orqali musulmon ayolning ro‘molini yoqib yuborishga uringan betanish shaxsga, musulmon ayolning yordam so‘rashi, baqiriq - chaqirig‘i ortidan kutubxona xavfsizlik xodimlari tomonidan monelik qilindi.
Kanada Musulmonlari milliy kengashi (NCCM), matbuotga bergan bayonotida, ushbu voqeadan dahshatga tushganliklarini bildirdi.
“Bunday zo‘ravonliklar jamiyatimizda odatiy holga aylanib borayotgani juda achinarli”, - degan Kanada Musulmonlari milliy kengashi Ijroiya qo‘mitasi raisi Stephen Brown, mavzu haqida shuningdek, “Islomofobiya voqealari oxirgi vaqtlarda avj oldi”, - degan ifodalarga o‘rin berdi.
So‘zlari davomida: “Saylangan rahbarlarimizning bu masalani o‘z vaqtida, birgalikda hal qilish vaqti keldi”, - deya gapirdi.
Ajax shahri meri Shaun Collier va kutubxona boshqaruv kengashi raisi Piyali Correya esa shahar veb - saytida qo‘shma bayonot e’lon qildi va unda:
“Ramazon oyida yuz bergan ushbu dahshatli voqeadan jabrlangan, jarohat olgan, bu hujumdan salbiy ta’sir ko‘rgan yoki kayfiyati buzilgan hammaga yordam berishni istaymiz. Nafrat va murosasizlikka qarshimiz”. - deyildi.
Stephan Brownning ma’lum qilishicha, Kanada Musulmonlari milliy kengashi (NCCM), politsiya xodimlaridan mazkur voqea nafrat jinoyati sifatida qo‘lga olinishini talab qilgan.
