Kreml ma'lum qildi-ki, Rossiya Prezidenti Vladimir Putin Turkiya Tashqi ishlar vaziri Hakan Fidonni qabul qiladi. Fidon ikki kunlik tashrif bilan Moskvaga keladi.

“Kun davomida prezident Kremlda bir qator yopiq ishchi uchrashuvlarni o‘tkazadi. Shuningdek, bugun Moskvaga ishchi tashrif bilan kelgan Turkiya Tashqi ishlar vaziri Fidonni qabul qiladi,” dedi Kreml matbuot kotibi Dmitriy Peskov dushanba kuni Moskva shahrida jurnalistlarga.

Peskovning aytishicha, Putin va Fidon “tabiiyki” Ukraina masalasini asosiy mavzu sifatida muhokama qilishadi.

Ikki tomonlama munosabatlar

Peskovning qo‘shimcha qilishicha, Fidon Rossiya Tashqi ishlar vaziri Sergey Lavrov bilan ham uchrashib, ikki tomonlama munosabatlarga oid muzokaralar olib boradi.

“Va, albatta, Ukraina masalasida fikr almashish majburiy bo‘ladi,” deya ta’kidladi u.

Dushanba kuni Fidon Rossiya Prezidentining yordamchisi Vladimir Medinskiy bilan ham uchrashdi. Medinskiy Rossiya va Ukraina o‘rtasida uch yildan ortiq vaqt ichida ilk bor Istanbulda o‘tkazilgan to‘g‘ridan-to‘g‘ri muzokaralarda Rossiya delegatsiyasiga rahbarlik qilgan edi.

16-may kuni Turkiya vositachiligida o‘tkazilgan ushbu muzokaralar yakunida tomonlar har bir tarafdan 1,000 kishilik mahbuslarni keng ko‘lamda almashish va sulh bo‘yicha muzokaralarni davom ettirishga kelishib olishdi.

Yakshanba kuni Turkiya Tashqi ishlar vazirligi Fidonnning dushanba kunidan boshlanadigan ikki kunlik tashrifi haqida e’lon qildi, biroq qo‘shimcha tafsilotlarni bermadi.