Kenya imetangaza mchezaji wa zamani wa kimataifa wa Afrika Kusini Benni McCarthy kama kocha siku ya Jumatatu, takriban wiki tatu kabla ya kuanza tena kampeni ya kuania kufuzu kwa Kombe la Dunia.

McCarthy, aliyezinduliwa katika mkutano na waandishi wa habari jijini Nairobi, mara ya mwisho alikuwa kwenye benchi la ufundi la Manchester United kwa misimu miwili chini ya meneja Erik ten Hag, akifanya kazi kama kocha wa washambuliaji.

Uzoefu wake wa hapo awali wa ukocha umekuwa katika vilabu vya Afrika Kusini Cape Town City na AmaZulu.

Ataiongoza Kenya kwa mara ya kwanza mwishoni mwa mwezi huu katika mechi ya ugenini dhidi ya Gambia ikifuatiwa na pambano la nyumbani dhidi ya Gabon.

Mwenyeji mwenza AFCON

Kenya inawafuata vinara Ivory Coast kwa alama tano katika Kundi F kufuzu kwa Kombe la Dunia lakini wana mechi sita za kucheza.

Washindi wa kundi wanafuzu kwa fainali hizo huku washindi wanne bora wakiwa na nafasi ya kusonga mbele kupitia mzunguko wa pili.

Kenya itaandaa fainali za Kombe la Mataifa ya Afrika 2027 ikiwa mwenyeji mwenza wa Tanzania na Uganda lakini haikufuzu kwa fainali za 2025 nchini Morocco.

McCarthy mwenye umri wa miaka 47, ambaye aliichezea Afrika Kusini mechi 80 na kufunga kwenye Kombe la Dunia la 1998 na 2002, alicheza Ligi Kuu ya England akiwa na timu za Blackburn Rovers na West Ham United. Alishinda Kombe la Ligi ya Mabingwa barani Ulaya akiwa na klabu ya Porto mnamo 2004.