Претседателот на Фудбалската федерација на Македонија (ФФМ), Масар Омерагиќ, оствари средба со претседателот ФИФА, Џани Инфантино во рамки на официјалниот самит на Светската фудбалската Асоцијација во Мајами, САД. 

На средбата се разговараше за идните правци во развојот на фудбалот во Македонија и поддршката од ФИФА, соопшти ФФМ на 21 јуни.

Како што информираат оттаму, претседателот Масар Омерагиќ истакна дека „ФФМ нема да инвестира во празни форми, туку во суштина, односно во терени, рефлекторско осветлување и услови каде што навистина се развива фудбалот. “

„Нашата визија се мали, но квалитетни стадиони. Не трибини без публика, туку терени, таму каде што почнува фудбалот,“ порача Омерагиќ. 

Од ФФМ додаваат дека ваквиот пристап бил поддржан од Инфантино, кој посочил дека и во рамки на ФИФА се води токму таква стратешка дискусија, подобро е мал, но квалитетен стадион, отколку голем објект без содржина.

Дополнително, информираат од ФФМ, презентирана е иницијативата на ФФМ клубовите да добиваат бесплатна опрема со услов да не се продава, туку да се донира на младите категории и децата. 

„Инфантино го поздрави концептот и најави дека ќе го сподели како позитивен пример на следните состаноци на ФИФА. ФФМ изразува искрена благодарност за приемот и вниманието што претседателот на ФИФА го посвети на македонскиот фудбал“, се наведува во соопштението од ФФМ.

Воедно, како што истакнуваат, од страна на првиот човек на македонскиот фудбал упатена е покана до претседателот на ФИФА за официјална посета на земјава.