Кина денеска повика на траен и ефикасен прекин на огнот меѓу Израел и Иран, еден ден откако американскиот претседател Доналд Трамп објави прекин на непријателствата меѓу двете земји.

„Кина внимателно ги следи случувањата на Блискиот Исток. Се надеваме дека ќе видиме траен и ефикасен прекин на огнот и ќе работиме на промовирање на мирот и стабилноста на Блискиот Исток “, изјави портпаролот на Министерството за надворешни работи Гуо Џиакун на прес-конференција во Пекинг.

Според Гуо Кина и Иран делат традиционално пријателство.

„Кина е подготвена да одржува пријателска соработка со иранската страна, да им користи на народите и да донесе позитивни фактори за мирот и стабилноста на Блискиот Исток“, додаде тој.

Тој, исто така, коментираше за неодамнешната изјава на Трамп дека Кина може да продолжи да купува нафта од Иран.

„Кина ќе се базира на своите национални интереси и ќе преземе неопходни и разумни мерки за да го обезбеди својот енергетски сектор“, додаде тој.

Во врска со заедничката изјава на БРИКС за ескалацијата на безбедносната ситуација на Блискиот Исток, Гуо рече дека организацијата е важна сила во одржувањето на светскиот мир и стабилност, како и во почитувањето на меѓународната праведност и правда.

„Кина е подготвена да соработува со земјите од БРИКС за да продолжат да вложуваат напори за одржување на мирот и стабилноста на Блискиот Исток“, додаде тој.