Арапскиот свет објави соопштенија во кои ги осудува вчерашните изјави на израелски министер за употреба на „нуклеарна бомба“ во Газа.

„Министерот за културно наследство Амичаи Елијаху изјави дека една од опциите на Израел во војната во Газа е да фрли нуклеарна бомба во Појасот“, објави „Тајмс оф Израел“.

Во интервјуто за радиото, Елијаху, исто така, „го изнесе својот приговор да се дозволи каква било хуманитарна помош во Газа“.

„Изјавите се доказ за степенот на отстапување и екстремизам“, изјави на социјалната мрежа Х Ахмед Абу Зеид, портпаролот на египетското Министерство за надворешни работи.

„Меѓународната заедница мора решително да се соочи со реториката на насилство, омраза и расизам“, рече тој.

Министерство за надворешни работи на Кувајт на Х соопшти дека „израелската окупација и нејзината агресија врз палестинскиот народ достигнале опасна фаза и нејзината ароганција достигнала степен на бруталност без преседан во човечката историја“.

Министерството го повтори „апелот на Кувајт до меѓународната заедница и Советот за безбедност (ОН) да го запрат геноцидот врз братскиот народ на Палестина.

Министерството за надворешни работи на Обединетите Арапски Емирати соопшти дека изјавите „претставуваат кршење на меѓународното право и поттикнување за извршување сериозни прекршувања на меѓународното хуманитарно право и воени злосторства, а исто така предизвикува сериозна загриженост за постоењето намера да се изврши кривично дело геноцид“.

Организацијата за исламска соработка (ОИС), исто така, ги осуди изјавите, велејќи дека „рефлектира екстремизам и говор на омраза, поттикнување насилство, организиран тероризам и злосторство геноцид извршено секојдневно од страна на израелската окупација врз палестинскиот народ, со флагрантно кршење на меѓународното право и меѓународните конвенции и резолуции“.

По неговите изјави, Елијаху беше суспендиран од владините состаноци на неодредено време, соопшти Кабинетот на израелскиот премиер Бенјамин Нетанјаху, додавајќи дека неговите изјави „не се засноваат врз реалноста“.

Израелската армија „оперира во согласност со највисоките стандарди на меѓународното право за да избегне да им наштети на невините“, соопшти Канцеларијата.

Бројот на Палестинци кои загинаа во израелските бомбардирања во Појасот Газа се искачи на 9.770, објави вчера Министерството за здравство во блокираната енклава.