Рускиот претседател Владимир Путин рече дека е „бесмислица“ и „глупост“ идејата дека Русија има намера да ги нападне Европа и НАТО по Украина.

Говорејќи на состанокот со воените пилоти во градот Торжок во Тверската Област северно од Москва, Путин рече дека западните политичари го „заплашуваат“ своето население со имагинарна руска закана за да добијат повеќе пари за конфликтот во Украина.

Тој истакна дека од светските воени трошоци околу 40% ѝ припаѓаат на Соединетите Американски Држави, а 3,5% на Русија.

„Дали ние, имајќи ја оваа разлика (во трошоците за одбрана), ќе се бориме со НАТО или нешто слично? Ова е само глупост!“

„Она што го велат за нас дека ќе ја нападнеме Европа по Украина е целосна бесмислица. Заплашување на сопственото население исклучиво со цел да се извлечат пари од нив, од нивниот народ“, рече рускиот претседател.

Путин нагласи дека Русија нема намери за агресија и „никогаш немаше да почне борби во Украина доколку не се случеше државен удар проследен со воена акција во Донбас“.

По осум години „измама“ со договорите од Минск, Русија „едноставно беше принудена да се префрли на друга форма на заштита на своите интереси“, рече тој.

„Војната во Украина започна во 2014 година... Сепак, се согласивме да ги потпишеме договорите од Минск (со цел да се стави крај на конфликтот). Испадна дека сме измамени. Осум години го одолговлекуваат (спроведувањето) и на крај нѐ принудија да транзитираме во поинаква форма на заштита на нашите интереси и народ“, рече Путин.

„Денешниот конфликт меѓу Русија и Украина немаше да постои доколку се земеа предвид безбедносните интереси на Москва по распадот на Советскиот Сојуз“, рече рускиот претседател.