Владимир Путин утре по петти пат ќе биде инаугуриран за претседател на Русија. Церемонијата за инаугурација на која Путин ќе положи заклетва ќе се случи во Кремљ, Москва.

Церемонијата официјално ќе го означи почетокот на уште еден шестгодишен мандат на Путин, кој освои 87,28 отсто од гласовите за време на претседателските избори одржани во март.

По церемонијата за инаугурација, актуелната руска влада ќе поднесе оставка, а новата влада ќе стапи на функција со одобрение од парламентот на земјата, во согласност со уставниот амандман направен во 2020 година.

Во таа насока, Путин ќе го претстави својот кандидат за премиер на одобрување пред руската Државна дума, Долниот дом на парламентот на земјата.

Парламентот има моќ да го прифати или отфрли кандидатот најмногу три пати. Ако тоа се случи Путин ќе може директно да го именува премиерот без да има потреба од одобрение од парламентот.

Во таков случај и Путин ќе има право да го распушти парламентот и да одржи нови парламентарни избори.

Според локалните медиуми, актуелниот премиер Михаил Мишустин најверојатно ќе биде повторно назначен бидејќи се смета за успешен шеф на влада врз основа на растечката економија на земјата и покрај тековната руско-украинска војна и последователните економски санкции од Западот.

Путин директно ќе ги назначи министрите за надворешни работи, одбрана, правда, вонредни ситуации и внатрешни работи на земјата во консултација со Советот на Федерацијата, горниот дом на рускиот парламент.

Се вели дека актуелниот министер за надворешни работи Сергеј Лавров и министерот за одбрана Сергеј Шојгу ќе ги задржат своите функции, додека промени не се очекуваат ниту во министерствата поврзани со економија и финансии.

Сепак, поради критиките на јавноста кон политиките за образование, спорт и култура, може да има одредени промени во ресорните министерства, а постои и можност за формирање Министерство за млади.

Врз основа на руските закони, процесот на одобрување на новата влада може да потрае најмногу до 20 мај, иако се предвидува дека листата на кандидати за премиер и совет на министри ќе биде претставена пред парламентот веднаш по церемонијата на инаугурација.