Најмалку 69 лица, меѓу кои 25 мигранти од Мали, загинаа откако чамец потона недалеку од брегот во територијалните води на Мароко на 19 декември, соопштија денес властите на Мали, пренесува Анадолу.

Министерот за дијаспора на Мали и за африканска интеграција, Моса Аг Атахер, истакна дека импровизираниот чамец со кој патувале мигрантите однел неколку животи, вклучително и жители на Мали.

„Дваесет и пет млади Малијци за жал се официјално идентификувани меѓу жртвите“, се вели во соопштението.

Најмалку 69 лица загинаа на чамецот со мигранти кој превезувал 80 патници. Единаесет преживеани се државјани на Мали.

Децениските конфликти, сиромаштијата и невработеноста принудуваат стотици млади од регионот на Сахел и други делови на африканскиот континент да тргнат по смртоносните патишта за преку море да стигнат до Шпанија, а подоцна и во други западни земји во потрага по подобар живот.