Австралискиот министер за индустрија и наука Ед Хусиќ изрази загриженост за заштита на приватноста на новиот кинески чет-бот за вештачка интелигенција Дип Сик (DeepSeek), повикувајќи ги корисниците внимателно да размислат пред да го преземат.

„Мислам дека луѓето природно ќе сакаат да го испробаат. Мислам дека ќе има паралели со она што го видовте со дискусијата околу Тик Ток кои ќе се појават и околу Дип Сик. Не би бил изненаден ако тоа ни се повтори“, рече Хусиќ.

Австралискиот министер рече дека Кина од последната деценија е решена да биде светски лидер во вештачката интелигенција и повика на претпазливост при преземањето на кинеската апликација.

Во понеделникот, американскиот претседател Доналд Трамп рече дека ненадејниот пораст на кинеската апликација за вештачка интелигенција Дип Сик треба да биде „повик за будење“ за американските технолошки компании.

Нудејќи поефикасна и поисплатлива алтернатива на Чат ГПТ на Опен АИ, Дип Сик ги разбранува западните технолошки гиганти.

Поддржан од кинескиот хеџ фонд Хај Флајер, Дип Сик го лансираше својот голем јазичен модел Р1 на 20 јануари.

За разлика од платформата заснована на претплата и затворен код на Чат ГПТ, со цена од 200 долари месечно, Р1 е целосно со отворен код и бесплатен, дозволувајќи им на корисниците да пристапат и да работат со него на секој хардвер без ограничувања.