Платформата ЈуТјуб објави дека по десет години ќе ја укине страницата „Во тренд“ (Trending) и листата „Сега во тренд“ (Trending Now) и ќе ги замени со листи по категории кои ќе бидат дел од ЈуТјуб Табели (Charts).

Оваа промена означува крај на единствената листа на најпопуларните видеа и премин кон прикажување на најгледаната содржина во специфични области како што се музика, подкасти и трејлери за филмови, објавува ТехКранч (TechCrunch).

„Трендовите денес се откриваат поинаку отколку во 2015 година кога беше лансирана страницата. Веќе нема само едно вирално видео - сега има илјадници микротрендови кои обликуваат различни заедници“, се наведува во официјалното соопштение на компанијата.

Посетите на страницата „Trending“ се намалуваат веќе пет години, според ЈуТјуб, бидејќи корисниците сè повеќе откриваат нови клипови преку коментари, пребарување или почетната страница.

Најавените промени на глобално ниво ќе стапат на сила во текот на следните неколку недели, додава компанијата.