Бројот на жртви на гладот што го наметна Израел во Појасот Газа се зголеми за 14 во изминатите 24 часа, а вкупно 147 лица починаа како резултат на гладувањето на Палестинците во окупираната енклава.

Во соопштението на Министерството за здравство во Појасот Газа, се наведува дека меѓу жртвите на гладот се 88 деца.

Министерството додаде дека 14 лица, вклучувајќи деца, починале од глад и неухранетост во изминатите 24 часа и покрај тоа што Израел дозволил ограничени испораки на помош до окупираната палестинска енклава.

Меѓународниот комитет на Црвениот крст претходно објави дека ситуацијата во Газа е „катастрофална“ и дека е потребно итно значително да се зголеми количината на храна и бројот на хуманитарен персонал.

Заменик-координаторката за здравство на Црвениот крст во Газа, Фелисити Гејпс, изјави дека некои мајки и нивните ќерки ѝ кажале дека биле ранети додека се обидувале да донесат храна и дека биле убедени дека нема безбедно место во цела Газа.