Тим научници од Универзитетот во Единбург во Шкотска разви пионерска техника за претворање на пластичен отпад во парацетамол со употреба на генетски модифицирани бактерии.

Ова откритие, кое беше објавено во списанието Нејчер (Nature), би можело да го револуционизира управувањето со отпадот и одржливото производство на лекови.

Истражувањата покажаа дека бактеријата Ешерихија коли (E.coli), која често се користи во биотехнологијата, може да ја трансформира терефталната киселина, молекула создадена од шишиња и кутии од полиетилен терефталат (ПЕТ), во активна состојка во популарните аналгетици и антипиретици.

Користејќи процес на ферментација сличен на оној во производството на пиво, истражувачите успеаја да ја извршат оваа конверзија за помалку од 24 часа со ефикасност од 90 проценти, што под оптимални услови може да достигне и до 92 проценти.

Овој процес, кој се спроведува на собна температура, создава минимални емисии на јаглерод, за разлика од вообичаениот индустриски метод, кој значително придонесува за климатските промени.

„Овој процес покажува дека ПЕТ пластиката не е само отпад или материјал за рециклирање, туку микроорганизмите можат да ја претворат во вредни производи, вклучително и лекови“, објасни раководителот на тимот Стивен Волас.

Над 350 милиони тони пластичен отпад се генерираат секоја година, и иако постојат методи за рециклирање, тие произведуваат големи трошоци за енергија и животната средина.

Истражувањето е финансирано од британската агенција ЕПСРЦ и фармацевтската компанија АстраЗенека (AstraZeneca), со поддршка на универзитетскиот центар за трансфер на технологии Единбург Иновации.

Иако оваа техника сè уште не е подготвена за индустриска примена, истражувачите веруваат дека означува почеток на нова ера во одржливото производство на лекови.