Конститутивната седница на Собранието на Косово во вторник беше прекината по 40-ти пат, бидејќи предлогот на Движењето Самоопределување гласањето за избор на претседател на Собранието да биде тајно не беше прифатен, а продолжението е закажано за четврток.

„За предлогот гласаа 51 пратеник „за“, ниту еден против, немаше воздржани“, објави претседателот на конститутивната седница, Авни Дехари.

Јубилејниот 40-ти неуспешен обид за конституирање се одржа во сенка на неодамнешната пресуда на Уставниот суд на Косово, со која на пратениците им се наложува да го изберат раководството на Собранието во рок од максимум 30 дена.

На почетокот на седницата, тој потсети дека на претходните седници, Демократскиот сојуз на Косово, Демократската партија на Косово, Алијансата за иднината на Косово и Српската листа не предложија членови за комисијата за тајно гласање и ги покани да го сторат тоа, што повторно го одбија.

Самоопределување, партијата на вршителот на должноста премиер на Косово, Албин Курти, исто така претходно побара тајно гласање за претседател на Собранието, но тоа не беше прифатено.

Албулена Хаџију е кандидатка на Самоопределување за претседател на новото свикување на Собранието, избрана по општите избори на 9 февруари. Таа доби максимум 57 гласови во претходните обиди, а за да биде избрана, за неа треба да гласаат 61 пратеник.

Констутитивната седница на Собранието на Косово започна на 15 април.

Врз основа на резултатите од изборите на 9 февруари, ниту една партија нема доволно мандат самостојно да формира влада.

Самоопределување има 48 места, Демократската партија на Косово 24, Демократскиот сојуз на Косово 20, Алијансата за иднината на Косово и иницијативата Нисма осум, Српската листа девет, Партијата за слобода, правда и опстанок едно, а преостанатите десет им припаѓаат на претставници на малцинските заедници.