Кинескиот министер за надворешни работи Ванг Ји ја предупреди својата европска колешка Каја Калас за опасноста од „конфронтација“, се вели во соопштението на неговото министерство во четврток, додека Пекинг се обидува да се претстави како стабилна противтежа на Вашингтон.
„Кина и Европската Унија не треба да се сметаат себеси за соперници поради нивните меѓусебни разлики, ниту да бараат конфронтација поради нивните несогласувања“, изјави Ванг Ји во среда на состанокот во Брисел со шефот на европската дипломатија.
Каја Калас во среда изјави дека Пекинг треба да престане да ја загрозува европската безбедност, наведувајќи ги кибер нападите, мешањето во демократските процеси и нефер трговските практики.
„Европа се соочува со неколку предизвици, од кои ниту еден во минатото, сегашноста или иднината не е предизвикан од Кина“, тври Ванг Ји
Ванг генерално се обидуваше да го претстави Пекинг како противтежа на администрацијата на американскиот претседател Доналд Трамп, која се заканува со царини за стоки увезени од Европа.
„Патот што го зедоа Соединетите Американски Држави не треба да се гледа како одраз на Кина“, рече тој. „Кина не е како Соединетите Американски Држави“, додаде тој.
Двете страни разговарале и за други прашања како што се Украина, израелско-палестинскиот конфликт и нуклеарната програма на Иран, според соопштението од кинеското Министерство за надворешни работи.
„Пекинг и Брисел мора да покажат меѓусебно почитување“, рече Ванг, додавајќи дека Европа треба да промовира „поактивна и попрагматична“ политика кон Кина.
Ванг, исто така, се сретна со претседателката на Европската комисија, Урсула фон дер Лајен, и белгискиот министер за надворешни работи, Максим Прево, во среда.
Кина и ЕУ мора да „го бранат мултилатерализмот и слободната трговија... и да соработуваат во справувањето со глобалните предизвици како што се климатските промени“, му рече Ванг на претседателот на ЕК.
Ванг Ји ќе ги посети Германија и Франција пред самитот ЕУ-Кина на кој ќе учествуваат кинескиот претседател Кси Џинпинг и неколку високи европски претставници.
