Во близина на Бранковиот мост во Белград е поставен камен-споменик со бројот „8372“, што го претставува бројот на жртвите од геноцидот во Сребреница.

Во близина на каменот е поставена пораката „Луѓето се сеќаваат на луѓето“.

По повод одбележувањето на 30-годишнината од геноцидот во Сребреница, во четврток во Белград се одржа комеморативна акција од група невладини организации под слоганот „Никогаш нема да го заборавиме геноцидот во Сребреница“.

Собраните ги повикаа властите во Србија да престанат да го негираат геноцидот во Сребреница, а симболично носеа огледала со црна лента.

Тие побараа 11 јули да се прогласи за Ден на сеќавање на геноцидот во Сребреница, по примерот на Резолуцијата усвоена од Генералното собрание на Обединетите нации во мај минатата година.

Нивното барање е и отстранување на муралите што го слават Ратко Младиќ, поранешен генерал на војската на Република Српска, кој беше осуден за геноцидот во Сребреница низ цела Србија.

Претседателот на Србија, Александар Вучиќ, пак, во име на граѓаните на Србија, изрази сочувство до семејствата на бошњачките жртви во Сребреница и изрази верување дека сличен злостор никогаш повеќе нема да се случи.

Во објава на мрежата X, Вучиќ истакна дека не можеме да го промениме минатото, но дека мора да ја промениме иднината.

„Денес се навршуваат триесет години од ужасниот злостор во Сребреница. Не можеме да го промениме минатото, но мора да ја промениме иднината. Уште еднаш, во име на граѓаните на Србија, изразувам сочувство до семејствата на бошњачките жртви, убеден дека сличен злостор никогаш повеќе нема да се случи“, рече претседателот Вучиќ.