Чешка и Велика Британија потпишаа меморандум за нуклеарна енергија, објави чешкиот премиер Петр Фиала по средбата со неговиот британски колега Кир Стармер.

„Направивме конкретен чекор со премиерот Стармер - потпишавме меморандум за поблиска соработка во нуклеарната енергија. Ова ќе помогне да се обезбеди енергетска безбедност и прифатлива енергија за идните генерации“, напиша вчера Фиала на X.

Тој сигнализираше интензивна соработка за развој на мали модуларни реактори, во кои ќе бидат вклучени и чешката компанија CEZ и британската компанија Rolls-Royce SMR.

„Односите меѓу Чешка и Обединетото Кралство се одлични. Обединетото Кралство е наш клучен партнер“, истакна Фиала.

Тој изјави дека дополнително разговарале за зајакнување на билатералната трговија, заедно со ситуацијата во Украина.

„Двете наши земји цврсто застанаа на страната на Украина од почетокот на руската агресија. Се согласивме дека воената помош треба дополнително да се зајакне - и заради безбедноста на цела Европа“, додаде тој.

Стармер, од своја страна, напиша на X дека договорот за нуклеарна енергија со Чешка ќе донесе „почиста енергија, подобри работни места и поголема безбедност“.