Фудбалерот на Ливерпул, Диого Жота, загинал во четвртокот во Шпанија во сообраќајна несреќа, објави реномираниот шпански спортски весник „Марка“.

Како што објави „Марка“, Жота (28) загинал заедно со својот брат Андре (25), исто така професионален фудбалер, кога возилото во кое патувале излетало од патот, предизвикувајќи пожар.

Според сведоците кои ја повикале брзата помош, автомобилот бил во пламен, кој се проширил на блиската вегетација.

Несреќата се случила во покраината Замора, на 65-тиот километар од автопатот А-52 во близина на општината Паласиос се Санабрија.

Според медиумите, фудбалерот на Ливерпул бил на одмор во Шпанија откако се венчал пред десет дена, а наскоро требал да се појави на клупскиот собир на „Енфилд“. Зад себе остави три деца.

Жота одигра 182 натпревари за Ливерпул во сите натпреварувања во кои постигна 65 гола. Тој ја освои Премиер лигата, ФА Купот и Лига Купот додека играше за „Црвените“. Пред Ливерпул, тој играше за Вулверхемптон, Атлетико Мадрид, Порто и Пасо Фереира.

Жота одигра 49 натпревари за португалската репрезентација во кои постигна 14 гола. Тој освои две Лиги на нации со репрезентацијата, во 2019 и 2025 година.