Цените на природниот гас во Европа паднаа за 12 проценти откако американскиот претседател Доналд Трамп објави прекин на огнот меѓу Израел и Иран.

Цената по мегават-час за јулските фјучерси нa холандската виртуелна берза за природен гас со најголем промет во Европа утрово беше 36,4 евра за мегават-час, што е намалување од 10,1 процент во однос на вчерашната од 40,5 евра.

Како што одминуваше денот, цените продолжија да паѓаат, достигнувајќи 35,8 евра во 9 часот наутро по локално време, што е намалување од 12 проценти во однос на претходниот ден.

Европските цени на гасот беа исклучително нестабилни во последните две недели, достигнувајќи 41,9 евра за мегават-час на 19 јуни, највисоко ниво од почетокот на април, поради загриженоста дека ескалацијата на конфликтот, предизвикана од израелските напади врз Иран, би можела да го затвори Ормутскиот теснец и да ја наруши глобалната трговија со течен природен гас.

Околу 20 проценти од светската трговија со течен гас поминува низ Ормутскиот теснец.