Најмалку 271 лице се повредени во најновиот ирански ракетен напад врз Израел во четврток наутро, објави израелското Министерство за здравство.

Четири повредени лица се во сериозна состојба, додаде Министерството.

Според израелскиот јавен радиодифузер КАН, околу 20-30 ирански ракети беа насочени кон централните израелски градови, вклучувајќи ги Тел Авив, Рамат Ган и Холон, како и болницата Сорока во јужниот град Бершеба.

Иранската државна новинска агенција ИРНА тврди дека ракетите биле насочени кон седиштето на израелската армија и разузнавачките служби во близина на болницата Сорока и дека има повредени во болницата во новиот бран напади.

„Ќе продолжиме да напаѓаме која било цел што му припаѓа на агресивниот ционистички режим и не гледаме граници пред нас“, изјави началникот на Генералштабот на иранските вооружени сили, генерал-мајор Абдолрахим Мусави, во изјавата што ја пренесе полуофицијалната иранска новинска агенција Тасним.

Израелската војска, пак, соопшти дека целта на нивните напади бил нуклеарниот реактор Арак југозападно од Техеран и локацијата за развој на нуклеарно оружје во Натанц, југоисточно од главниот град.

Непријателствата започнаа во петокот кога Израел започна воздушни напади врз неколку локации низ Иран, вклучувајќи воени и нуклеарни објекти, што го натера Техеран да започне одмазднички напади.

Израелските власти соопштија дека најмалку 24 лица се убиени, а стотици се повредени во иранските ракетни напади од тогаш.

Во Иран, 585 лица се убиени, а повеќе од 1.300 се ранети во израелските напади, според извештаите на иранските медиуми.