Москва би сакала да разбере што значи изјавата на американскиот претседател Доналд Трамп за рок од 50 дена за завршување на украинската криза, изјави рускиот министер за надворешни работи Сергеј Лавров, потсетувајќи дека американскиот лидер постојано наведувал различни временски рамки за ова.

„Понекогаш беа 24 часа, понекогаш сто дена, поминавме низ сето тоа и навистина сакаме да разбереме што го мотивира американскиот претседател“, изјави Лавров за новинарите по состанокот на Советот на министри за надворешни работи на ШОС (Организација за соработка во Шангај), пренесува ТАСС.

Рускиот заменик-министер за надворешни работи Сергеј Рјабков во вторник изјави дека Москва е подготвена за разговори откако американскиот претседател Доналд Трамп се закани со санкции за купувачите на руски извоз, но нагласи дека Русија не се согласува со ултиматуми.

Кремљ во вторник изјави дека неодамнешните изјави на Трамп, вклучително и заканата со санкции за купувачите на руски извоз, се сериозни и бараат анализа.

Трамп рече дека САД ќе воведат 100 проценти царини за руски стоки и секундарни санкции за Русија и нејзините трговски партнери доколку Москва и Киев не постигнат договор за решавање на вооружениот конфликт во рок од околу 50 дена.

Во интервју за Би-Би-Си, Трамп рече дека е разочаран од рускиот лидер Владимир Путин, но дека „сè уште не завршил со него“.

Според Трамп, договорот за решавање на украинскиот конфликт бил блиску до потпишување четири пати, но тој исто така рекол дека речиси никому не му верува во светската политика, вклучително и на Путин.