Германскиот канцелар Фридрих Мерц ја поздрави објавата на американскиот претседател Доналд Трамп дека Соединетите Американски Држави (САД) ќе обезбедат ново оружје за Украина, а трошоците ќе ги покријат европските сојузници, јавува Анадолу.

„Претседателот Трамп презеде важна иницијатива: САД ќе ѝ обезбедат на Украина оружје во голем обем доколку европските партнери го финансираат тоа“, рече Мерц.

Мерц истакна дека тој и Трамп разговарале за овој нов пристап повеќепати последните денови и нагласи дека Германија ќе преземе „одлучувачка улога“ во оваа иницијатива.

„Ние (Европејците) го правиме ова во наш сопствен интерес. Ова ќе ѝ помогне на Украина да се одбрани од бомбардирачкиот терор на Русија. Само на овој начин ќе се зголеми притисокот врз Москва конечно да преговара за мир“, рече Мерц.

„На крајот на краиштата, ние покажуваме дека како безбедносни партнери се здружуваме. Сега брзо ќе ги разјасниме деталите. За таа цел сме во контакт со нашите партнери“, додаде тој.

На вчерашниот состанок со генералниот секретар на НАТО, Марк Руте, во Овалната соба, Трамп изрази фрустрации поради Русија во врска со недостигот на напредок во мировните напори со Украина.

Трамп се закани дека ќе воведе 100% секундарни царини за Русија доколку не се постигне мировен договор во рок од 50 дена. Тој, исто така, најави нов договор според кој САД ќе произведуваат и ќе ѝ испорачуваат оружје на Украина преку НАТО, а европските сојузници ќе ги сносат сите трошоци.

„Денес постигнавме договор... Ќе им праќаме оружје за кое тие ќе плаќаат. САД нема да плаќаат ништо. Ние не го купуваме, но ние ќе го произведуваме, а тие ќе плаќаат за него“, рече тој.

Руте го потврди договорот, велејќи: „САД одлучија навистина масовно да ја снабдуваат Украина со она што е потребно преку НАТО. Европејците 100% плаќаат за тоа.“