Генералниот секретар на НАТО, Марк Руте, по повод 30-годишнината од геноцидот во Сребреница, денеска изјави дека тоа е трагедија што го потресе светот и засекогаш ја поврза неговата земја, Холандија, со Босна и Херцеговина.
Тој потсети дека како премиер го посетил Меморијалниот центар во Поточари и се сретнал со мајките на синовите кои никогаш нема да остарат.
„Никогаш нема да го заборавиме ужасот од тие темни денови. Нашите мисли се со сите погодени од тој злостор. Но, додека го почитуваме минатото, наша должност е да изградиме посветла иднина“, рече тој.
Осврнувајќи се на 30-годишнината од Дејтонскиот мировен договор, Руте нагласи дека договорот можеби не е совршен, но дека останува камен-темелник на стабилноста во Босна и Херцеговина.
„Дејтон му покажа на светот дека мирот може да победи. НАТО интервенираше во Босна и Херцеговина за да помогне во завршувањето на конфликтот што одзеде 100.000 животи во сите заедници. Ние бевме таму за вас тогаш. Помагаме во одржувањето на стабилноста во регионот веќе 30 години“, рече тој.
Тој додаде дека НАТО ќе продолжи да обезбедува поддршка преку канцеларии во Сараево и Белград, мисијата КФОР во Косово, како и поддршка за операцијата Алтеа на ЕУ во Босна и Херцеговина.
„Западен Балкан е регион од стратешко значење, за вашата и нашата безбедност. Нема да дозволиме да се создаде безбедносен вакуум. И не смеете да дозволите поделбите и неодговорната реторика да ве вратат назад“, предупреди Руте.
Тој рече дека НАТО обезбедува безбедносна рамка, но дека судбината на земјата е во рацете на нејзините граѓани.
„Потребно е храбро политичко водство за да се движиме напред. Видов надеж за подобра иднина во лицата на студентите што ги сретнав во Сараево претходно оваа година. Им должиме, и на сеќавањето на изгубената генерација, да градиме мир и просперитет секој ден, за сите“, заклучи Руте.
Останките на уште седум жртви од геноцидот во Сребреница, извршен од припадници на Армијата на Република Српска и нивните соучесници во јули 1995 година, ќе бидат погребани денес на колективен погреб во Меморијалниот центар Сребреница во Поточари.
