Индискиот премиер Нарендра Моди му кажал на американскиот претседател Доналд Трамп дека примирјето меѓу Индија и Пакистан по неодамнешниот вооружен конфликт е постигнато за време на преговорите меѓу двете армии, а не преку посредништво на САД, изјави денес висок индиски дипломат.

Трамп минатиот месец изјави дека Индија и Пакистан, две соседни нуклеарни сили, се согласиле на примирје по посредништвото на САД и дека непријателствата завршиле откако тој ги повика двете земји да се фокусираат на трговијата наместо на војната, објави Ројтерс.

Индија претходно негираше какво било посредништво од трета страна, а разговорот меѓу Моди и Трамп се одржа во вторник на маргините на самитот на Г7 во Канада, на кој Моди присуствуваше како гостин, и беше нивниот прв директен контакт од судирот меѓу Пакистан и Индија кој траеше од 7 до 10 мај.

„Премиерот Моди јасно му кажа на претседателот Трамп дека разговорите за прекин на воените операции се водат директно меѓу Индија и Пакистан преку активни воени канали и на инсистирање на Пакистан. Премиерот Моди потоа потсети дека Индија не прифаќала медијација во минатото и истакна дека никогаш нема да го стори тоа“, рече неименуваниот индиски дипломат.