Членовите на Делегацијата од Меѓупарламентарната група за пријателство Туркије – Северна Македонија, на Големото турско национално собрание, кои се во возвратна посета на земјава, остварија средба со Комисијата за надворешна политика и надворешна трговија на Собранието на РСМ, како уште една потврда за исклучително добрата соработка меѓу двете земји во повеќе области.

Претседателот на Комисијата за надворешна политика и надворешна трговија Муса Џафери, во своето обраќање, ја истакна длабоката и искрена соработка меѓу Северна Македонија и Туркије, која, како што рече, црпи сила од заедничката историја и долгогодишните блиски односи, изградени на заемна доверба и пријателствои зајакнати преку конкретни проекти и иницијативи.

На средбата, пратениците од двете страни разменија мислења за дипломатските односи меѓу Северна Македонија и Туркије уште од почетоците на незавиосноста на нашата земја, при што е заклучено дека стратешката соработка треба да се зајакнува преку редовен дијалог и размена на најдобрите практики.

Соговорниците разговараа  и за соработката во областа во одбраната, а во тој контекст и значењето на регионалната стабилност и сигурност.

Посебно беше истакната важноста на трговската размена меѓу Северна Македонија и Туркије, која ја надмина границата од една милијарда долари.