Високата претставничка на Европската Унија за надворешни работи и безбедносна политика, Каја Калас, во четврток ја пофали улогата на Туркије во дипломатијата, велејќи дека ЕУ ја гледа Туркоје како безбедносен играч, пренесува Анадолу.

„Кога станува збор за улогата на Туркије, Истанбул е место каде што се одржуваат многу состаноци. Затоа сите се благодарни на Туркије за понудата на ова посредништво“, изјави Калас пред новинарите кога беше прашана за тековните тензии на Блискиот Исток.

Калас рече дека неодамнешните одлуки на ЕУ за безбедноста и одбраната ослободија значителни средства, со над 800 милијарди евра достапни за поддршка на заеднички проекти за набавки и одбрана.

Таа нагласи дека овие инструменти, вклучително и механизмот за заем САФЕ, не се протекционистички и можат да се користат во соработка со земји-партнери како што е Туркије.

„Сега Туркије како земја-кандидат има пристап до САФЕ кредити, на пример, за заеднички проекти со европските земји“, рече таа, додавајќи дека овие алатки имаат за цел да ја зајакнат европската одбранбена индустрија, а во исто време да ја поттикнат соработката надвор од блокот.

„Дефинитивно ја гледаме Туркије како безбедносен играч“, додаде таа.

Што се однесува до Блискиот Исток, таа изрази загриженост поради зголемените тензии, особено нападите врз нуклеарните постројки и стравувањата од поширок конфликт.

Таа рече дека ЕУ ги поддржува дипломатските напори за спречување на ескалација и управување со ризиците поврзани со Иран и регионалната нестабилност.

„Оваа војна на Блискиот Исток е исклучително загрижувачка. Ризиците од погрешна проценка се многу високи и затоа се обидуваме да ги намалиме тензиите“, рече таа.

Претходно денеска Кристијан Бергер, директор на Центарот за одговор на кризи на Европската служба за надворешна акција ја пофали улогата на Туркије во олеснувањето на евакуацијата на граѓаните на земјите од ЕУ од Иран поради ескалацијата во Тел Авив и Техеран.

„Добивме голема поддршка од турските власти за да се осигуриме дека луѓето можат лесно да ја преминат границата, а потоа да добијат поврзувачки летови од источниот дел на земјата до меѓународен аеродром“, изјави Бергер.