Израелскиот премиер Бенјамин Нетанјаху денес прогласи „историска победа“ по 12 дена војна против Иран и му се заблагодари на претседателот на Соединетите Американски Држави Доналд Трамп за „одбраната“ на Израел.

„Израел никогаш немал пријател како претседателот Трамп во Белата куќа и му се заблагодарувам многу за нашата заедничка работа“, рече Нетанјаху, неколку часа откако Трамп го критикуваше Израел за кршење на примирјето со Иран.

Нетанјаху рече дека американските сили го „уништиле“ подземниот објект за збогатување ураниум во Фордо, додавајќи дека израелските и американските сили „ја испратиле нуклеарната програма на Иран во пропаст“.

„Ако некој во Иран се обиде да ја обнови таа програма, ние ќе дејствуваме со истата решителност, со истата сила, за да го спречиме секој таков обид. Повторувам - Иран нема да има нуклеарно оружје“, рече Нетанјаху во видео објава.

Нетанјаху додаде дека Израел ја уништил иранската програма за производство на балистички ракети и поголемиот дел од системите за лансирање, нанесувајќи „разорни удари на самиот злобен режим“.

Тој, исто така, го пофали нападот врз Иран рано утрово, пред да стапи во сила прекинот на огнот, што го налути американскиот претседател.

Израелскиот лидер додаде дека земјата мора да го победи Хамас и да ги врати заложниците од Газа, нагласувајќи дека Израел ќе отвори „оска на просперитет и мир за луѓето од регионот“ и пошироко, откако ќе ја ослабне „оската на злото“ на Иран.