Европскиот парламент во четвртокот ги разгледа политичките импликации од процесот на проширување на Европската Унија, особено напуштањето на едногласното донесување одлуки во некои области со цел да се забрза процесот на донесување одлуки, на што главно се спротивставуваат помалите земји-членки од страв да не го изгубат влијанието во донесувањето клучни одлуки.

Советот на Европската Унија и Европскиот совет донесуваат одлуки за голем број „чувствителни“ прашања како што се надворешната и безбедносната политика, финансиите, некои одлуки во правдата и внатрешните работи, проширувањето и усвојувањето санкции со консензус, односно со едногласна поддршка од сите земји-членки.

Некои европски политичари, осврнувајќи се на „вечното“ вето на Унгарија врз голем број одлуки на ЕУ по почетокот на руската агресија врз Украина, сметаат дека таков систем мора да се промени за Унијата да биде поефикасна, пред да се прошири со нови членови што би можеле дополнително да го комплицираат веќе комплицираниот процес на донесување одлуки.

„Проширувањето на Европската Унија останува стратешки императив“, изјави бугарската евро-комесарка Екатерина Захариева во дебатата во Европскиот парламент во четвртокот, но исто така истакна дека прифаќањето нови членови бара и преиспитување на функционирањето на ЕУ.

„Ставот на Комисијата е јасен, ако Унијата сака да дејствува брзо, ефикасно и стратешки, мора да го намалиме бројот на одлуки што се донесуваат едногласно“, рече комесарката за стартап компании, истражување и иновации.

Таа призна дека мора да се прифати дека ова е чувствително прашање и дека мора да се најде начин да се решат легитимните загрижености на некои држави.

Хрватскиот претставник во Европската Народна Партија (ЕПП) Томислав Сокол во дебатата рече дека прашањето за проширувањето нема апсолутно никаква врска со укинувањето на едногласноста.